Футболдағы әлемдік жанжал: Трамп күйеу баласы арқылы додаға қол салды

Әлемдік футболда ірі жанжал туындауы мүмкін. Бұған ФИФА басшылығының әлем чемпионаты құқықтарын жеке инвесторларға сату жоспары себеп болып отыр, деп хабарлайды Orda.kz.       

Sports.ru  басылымның мәліметінше, Джанни Инфантино әлем чемпионаттарын ұйымдастыру үшін жеке компания құрып, оның акцияларын Дональд Трамптың жақын ортасының қолдауымен сату жолдарын қарастыруда.

The Times газетінің жазуынша, ФИФА жоспары — негізгі активтерді басқару үшін компания құру. Оған ерлер арасындағы әлем чемпионаты, әйелдер чемпионаты және клубтық әлем чемпионаты кіреді. Жоба бойынша Трамп әкімшілігіне жақын адамдармен кеңес жүргізілгені айтылған.

Бұл ақпаратты ФИФА ресми түрде растады.

«Инвестициялық топты Thrive Capital компаниясы басқаруы мүмкін. Оны Джошуа Кушнер құрған,  ол Дональд Трамптың күйеу баласы Джаред Кушнердің інісі» деп жазылған жарияланымда. 

Жоспар бойынша ФИФА-ның 211 ұлттық қауымдастығының әрқайсысы шамамен 20 млн доллар көлеміндегі үлеске ие болады. Қауымдастықтар бұл үлесті сақтап қалуға немесе бірден қосымша табыс алу үшін сатуға мүмкіндік алады.

The Times дереккөздерінің айтуынша, Инфантино президенттік мерзімі аяқталғаннан кейін жаңа компанияның комиссары қызметіне тағайындалуы мүмкін. Оны 2031 жылға дейін баламасыз түрде ФИФА президенті етіп қайта сайлау ықтимал, ал одан кейін жаңа қызметке ауысуы мүмкін.

Алайда УЕФА бұл бастамаға қатаң қарсы шықты.

«Бұл — футболды басқарушы органдар ешқашан аттамауы тиіс шектен асып кету. УЕФА бұған аса үлкен жауапкершілікпен қарайды. Барлық ұлттық қауымдастықтар да солай істеуі керек. Лигалар, клубтар, ойыншылар, жанкүйерлер, үкіметтер — футболдың болашағына бейжай қарамайтындардың бәрі бұған назар аударуы тиіс.
Футболдың жаны мен басқару жүйесі — сатылатын актив емес, әсіресе кім қаржылай пайда көретіні белгісіз жағдайда. Ешқайсымыз футболдың иесі емеспіз. ФИФА-ның оны сатуға құқығы жоқ»,  деп мәлімдеді ұйым. 

Ұлыбританияның жаңа премьер-министрі Энди Бернем де бұл мәселеге пікір білдірді.

«Футбол инвесторларға тиесілі емес. Ол трибуналарды толтыратын, кез келген ауа райында өз командаларын қолдайтын адамдарға тиесілі. Әлем чемпионаты — тауар емес. 
Бұл — әлемдік спорттағы ең ірі жарыс, және ол ешқашан сатылатын деңгейде ешкімге тиесілі болған емес. Бұл келісімді қалай атасаңыз да, оның бір бөлігін сату — бәрін сатумен тең. Футбол жанкүйерлерге тиесілі. Әрқашан солай болған және солай болып қала береді», — деді ол. 

Еске салсақ, бұған дейін Дональд Трамп жеке өзі FIFA-ға жүгініп, АҚШ құрамасының шабуылшысы Фоларин Балогунға берілген бір матчтық дисквалификацияны алып тастауды сұраған болатын. Сөйтіп Трамптың өтінішімен FIFA тарихында алғаш рет дисквалификация жойылды.

FIFA бұл шешімді тәртіптік кодекстің 27-бабымен түсіндірді. Бұл бап кейбір жағдайларда жазаны уақытша тоқтатуға мүмкіндік береді. 

Оқи отырыңыз:

• Дастан Сәтбаев «Челси» сапында алғашқы голын 6-минутта-ақ соқты
• ӘЧ-2026: FIFA финал өткен алаңды бөлшектеп, сатылымға шығарды
• Месси мен Роналду дәуірі аяқталды: 2026 жылғы әлем чемпионаты несімен есте қалды?