Трамп өтініш жасады: FIFA тарихында алғаш рет дисквалификация жойылды

БАҚ мәліметінше, Дональд Трамп жеке өзі FIFA-ға жүгініп, АҚШ құрамасының шабуылшысы Фоларин Балогунға берілген бір матчтық дисквалификацияны алып тастауды сұраған, деп хабарлайды Orda.kz.       

Бұл туралы The Guardian дереккөздерге сілтеме жасап жазды. Басылымның мәліметінше, Трамп Балогун Босния және Герцеговина құрамасына қарсы матчта алаңнан қуылғаннан кейін FIFA басшылығымен үш рет байланысқа шыққан. 5 шілде күні ұйым дисквалификацияны уақытша тоқтататынын мәлімдеп, футболшыға әлем чемпионатының 1/8 финалында Бельгияға қарсы ойында алаңға шығуға рұқсат берді.

FIFA бұл шешімді тәртіптік кодекстің 27-бабымен түсіндірді. Бұл бап кейбір жағдайларда жазаны уақытша тоқтатуға мүмкіндік береді. Сонымен қатар, қызыл қағаз футболшының тәртіптік тарихында сақталады: егер бір жыл ішінде осындай ереже бұзушылық қайталанса, ол дисквалификацияны өтеуге міндетті болады.

Дональд Трамп бұл шешімді қолдап, FIFA «үлкен әділетсіздікті түзетті» деп мәлімдеді. Ал Бельгияның корольдік футбол қауымдастығы бұл шешімді сынға алып, оны ережелерге қайшы деп атады және алдағы әрекеттерді қарастырып жатқанын жеткізді. Бельгия құрамасының бас бапкері Руди Гарсия бұл жағдайды бірінші сәуірдегі әзілмен салыстырды.

АҚШ құрамасының бас бапкері Маурисио Почеттино FIFA шешімін қолдап, Балогунның алаңнан қуылуы бастапқыда тым қатаң болғанын айтты.

Бұған дейін Бразилия – Норвегия матчында Эрлинг Холанд сенсация жасап, қарсыласын әлем чемпионатынан шығарып тастаған еді.

Оқи отырыңыз:

• ӘЧ-2026: Марокко құрамасы Канаданы жеңіп, ширек финалға шыққан алғашқы команда атанды
• ӘЧ-2026 рекорды: Ең ұзақ уақыт бойы гол жібермеген қақпашы