Филиппиндегі жойқын жер сілкінісінен қаза тапқандар саны 12 адамға жетті

Филиппиннің оңтүстігінде болған магнитудасы 7,8 балдық жер сілкінісі салдарынан қаза тапқандар саны кемінде 12 адамға жетті, деп хабарлайды Orda.kz.

Associated Press агенттігінің мәліметінше, табиғи апаттан 200-ден астам адам жарақат алған. Зардап шеккендердің басым бөлігі бүлінген ғимараттардың ішінде болған. Сондай-ақ жағалаудағы аудандарда биіктігі бір метрге жететін цунами тіркелген. Филиппиннің Вулканология және сейсмология институты (PHIVOLCS) жер сілкінісінен кейін 138 афтершок болғанын хабарлады.

Бұған дейін Филиппиннің Азаматтық қорғаныс басқармасы қаза тапқандар саны сегіз адамға жеткенін мәлімдеген еді. Reuters агенттігінің хабарлауынша, жер сілкінісінен кейін Генерал-Сантос әуежайының жұмысы уақытша тоқтатылды.

Минданао аралында бірнеше мектеп ғимараты қирап, сабақтар тоқтатылды. Аймақта цунами қаупі туралы ескерту жарияланған. Филиппин ұлттық полициясының деректеріне сәйкес, жер сілкінісінің алғашқы сағаттарында үш адамның қаза тапқаны және төрт адамның жараланғаны хабарланған болатын.

Минданао аралының солтүстік және орталық бөліктерінде мектептерді, ауруханаларды және тұрғын үйлерді қоса алғанда жалпы саны 37 ғимарат зақымданған.

«Зардап шеккен аудандарда тұрғындарға көмек көрсету үшін полиция жұмылдырылды. Келтірілген шығын көлемін бағалау жалғасып жатыр» деп жазылған хабарламада.

Филиппин президенті Фердинанд Маркос кіші Минданао аралының бірқатар ауданында білім беру ұйымдары жұмысын уақытша тоқтатуды тапсырды.

Филиппиннің Азаматтық авиация басқармасы (CAAP) цунами қаупіне байланысты Генерал-Сантос қаласындағы әуежай жұмысын уақытша тоқтатқанын мәлімдеді.

Президент Фердинанд Маркос мемлекеттік органдарға табиғи апаттың салдарын жою жұмыстарын үйлестіруді, гуманитарлық көмек көрсетуді және эвакуациялық орталықтардың жұмысын қамтамасыз етуді тапсырды.

Жер сілкінісінен кейін Жапонияның бірқатар жағалау аймақтарында да цунами қаупі жарияланды. Биіктігі бір метрге дейін жетуі мүмкін толқындар туралы ескертуден кейін ондаған мың тұрғынға эвакуациялану ұсынылды.

Жапонияның метеорологиялық агенттігі Окинава префектурасы аралдарына, сондай-ақ Кюсю мен Сикоку аралдарына және Хонсю аралының Тынық мұхит жағалауына дейін, Ибараки префектурасына дейінгі аумақтарға цунами туралы ескерту жариялады.

Оқи отырыңыз:

• БҰҰ жасанды интеллекттің дамуы қоршаған ортаға әсер етеді деп алаңдап отыр
• 1,2 миллиард теңге жымқырды деп айыпталған Алмасбек Садырбайдың ісі: Сотта қандай мәселелер көтерілді?
• Петропавлда 77 жастағы зейнеткер 7 миллион теңгесін бизнеске «шақырған» алаяқтарға аудара салған