Елімізде қатерлі ісік пен сирек ауруларға қарсы дәрі шығарылады

25 мамыр 2026 11:11 Ләззат Сұңқар

Фото: Әлеуметтік желіден

Қазақстанда биофармацевтикалық өндірісті дамыту бағытында жаңа ірі жоба қолға алынбақ. Үкімет Алматы облысында толық циклді биофармацевтикалық кешен салуды мақұлдады, деп хабарлайды Orda.kz.

Жобаның жалпы құны 32,5 млрд теңге және ол жеке инвестиция есебінен жүзеге асырылады. Жоба аясында Қазақстан Республикасы денсаулық сақтау министрлігі мен «Steppe pharmaceuticals» ЖШС арасында инвестициялық келісім жасалады. Тиісті қаулыға премьер-министр Олжас Бектенов қол қойған.

Жаңа фармацевтикалық зауыт «Алатау» арнайы экономикалық аймағы аумағында орналасады. Кәсіпорын 20 түрлі дәрілік препарат өндіруге маманданады. Олардың қатарында онкологиялық және сирек кездесетін ауруларды емдеуге арналған дәрілер, сондай-ақ заманауи иммунобиологиялық препараттар бар.

Өндірісті іске қосу 2031 жылға жоспарланған. 2032 жылы зауыт толық іске қосылып, ал 2034 жылға қарай негізгі бағыттар бойынша толық өндірістік циклге көшеді деп күтілуде.

Кешен базасында тек дәрі өндірумен шектелмей, ғылыми-зерттеу жұмыстары да дамытылады. Атап айтқанда, биоэквиваленттілік зерттеулерін жүргізу, тіркеу досьелерін дайындау және GMP халықаралық стандарттарын енгізу көзделген. Сонымен қатар жоба аясында қазақстандық мамандарды оқыту және олардың біліктілігін арттыру жүйесін қалыптастыру жоспарланып отыр.

Үкіметтің бағалауынша, бұл бастама елдің дәрі-дәрмек қауіпсіздігін нығайтып, импортқа тәуелділікті азайтуға мүмкіндік береді. Кешен іске қосылғаннан кейін шамамен 60 жаңа жұмыс орны ашылады.

Айта кетейік, қазіргі уақытта Қазақстанда фармацевтика саласында сегіз ірі инвестициялық жоба жүзеге асырылып жатыр. Өткен жылдың қорытындысы бойынша отандық фармацевтикалық өнім өндірісі көлемі 191,1 млрд теңгеге жетіп, 2024 жылмен салыстырғанда 8,7%-ға артқан. Жалпы салаға тартылған инвестиция көлемі 390 млрд теңгеден асты.

Оқи отырыңыз:

Жаңалықтар

барлық жаңалықтар