Денсаулық сақтау министрлігі наркологиялық орталықтарды тексереді

ҚР Денсаулық сақтау министрлігі елдегі наркологиялық орталықтарға тексеріс жүргізілетінін мәлімдеді. Бұл туралы Orda.kz ведомствоның баспасөз қызметіне сілтеме жасап хабарлайды.

Министрліктің мәліметінше, денсаулық сақтау министрі Ақмарал Әлназарова жүргізушілерді медициналық куәландыру кезінде кейбір наркологиялық орталықтар тарабынан жіберілетін заңбұзушылықтар мәселесіне арналған кеңес өткізген.

«Кеңес барысында азаматтардың өтініштері, депутаттық сауалдар және алкогольдік мастықты анықтау кезінде белгіленген рәсімдердің сақталмауына қатысты анықталған фактілер қаралды. Министр Медициналық және фармацевтикалық бақылау комитетіне барлық өңірлік наркологиялық орталықтарға қолданыстағы стандарттар мен медициналық куәландыру тәртібінің сақталуын тексеру үшін кешенді тексеріс жүргізуді тапсырды»,  деп хабарлады ведомство. 

Ақмарал Әлназарова заңбұзушылықтар анықталған жағдайда материалдар қолданыстағы заңнама аясында процессуалдық шешім қабылдау үшін құқық қорғау органдарына жолданатынын атап өтті.

Сонымен қатар, денсаулық сақтау министрлігі медициналық куәландыру тәртібін реттейтін тиісті бұйрыққа өзгерістер мен толықтырулар әзірлемек. Бұл шаралар рәсімдердің ашықтығын арттыруға, азаматтардың құқықтарын қорғауға және даулы жағдайлардың алдын алуға бағытталған.

Оқи отырыңыз:

• Ауыр жүк көліктеріне елді мекендердің ішінде жүруге тыйым салынады
• Алаяқ азаматтарға жүргізуші куәлігін алып беремін деп уәде беріп, алдаған
• Қарағандыда Lada жүргізушісі 20 жастағы қызды қағып, ол оқиға болған жерде қаза тапты