Астана қалалық ауруханасында медбикеден туберкулёз анықталды

Астанада №1 қалалық ауруханада жұмыс істеген медбикеден туберкулёз табылды. Әлеуметтік желілерде тараған бұл ақпаратты елордалық денсаулық сақтау басқармасы растады, деп хабарлайды Orda.kz.       

Бұған дейін желіде №1 қалалық ауруханада балалармен жұмыс істеген медбикеден туберкулёз анықталғаны туралы мәлімет тараған еді. Денсаулық сақтау басқармасы бұл ақпараттың рас екенін мәлімдеді.

«Соңғы рет флюорографиядан 2026 жылдың ақпан айында емханада өткен, нәтижесінде ешқандай патология анықталмаған. Сәуір айында медициналық көмекке жүгінгеннен кейін ғана ауру белгілі болды. Соңғы рет жұмысқа 24 сәуірде шыққан. Қазіргі уақытта қалалық фтизиопульмонология орталығында ем қабылдап жатыр», деп хабарлады ведомство. 

Соңғы флюорографиялық тексеруден бері 6 ай немесе одан көп уақыт өткен барлық байланыста болған  39 қызметкерлер қайта тексеруден өткен. Олардың барлығында нәтиже теріс болған.

Сондай-ақ басқарма медбикемен соңғы үш ай ішінде байланыста болған барлық адамдарды да тексергенін мәлімдеді. Олардың арасында жұқтырғандар бар-жоғы әзірге айтылған жоқ.

Оқиғадан кейін ауруханада төсек-жабдықтар мен матрастарға дезинфекция жүргізілді.

Ведомствоның мәліметінше, бұған дейін медбике жұмысқа рұқсат алған және туберкулёз бойынша байланыста болған адамдар қатарында тіркелмеген.

Оқи отырыңыз: 

• ДСМ қазақстандықтарға хантавирус қаупіне қатысты ескерту жасады
• Елімізде биыл алғашқы тоқсанда 77 трансплантация жасалды
• ҚР ДСМ ауруханалар мен емханаларды жаппай тексереді