Елімізде әуе рейсі өзгерісін реттейтін жаңа платформа іске қосылады

FlyArystan әуе компаниясы рейстер кешіккен немесе тоқтатылған жағдайда жолаушыларға өз мәселесін өздігінен шешуге мүмкіндік беретін жаңа цифрлық жүйені іске қосады, деп хабарлайды Orda.kz.       

Жаңа сервис жолаушыларға байланыс орталығына хабарласпай-ақ, онлайн режимде әрі қарай не істеуге болатынын өз бетінше таңдауға мүмкіндік береді. Бұл туралы 20 тамызда әуе компаниясының баспасөз қызметі хабарлады.

Егер рейс ұшуға дейінгі 72 сағат ішінде кешіксе немесе тоқтатылса, жолаушы билет рәсімдеу кезінде көрсеткен WhatsApp нөміріне немесе электронды поштасына жеке хабарлама алады.

«Хабарламада рейстің өзгеруіне қатысты негізгі ақпарат, оның ішінде бастапқы және жаңа ұшу уақыты көрсетіледі», деп хабарлады әуе компаниясы. 

WhatsApp немесе электронды пошта арқылы жіберілген бірегей сілтеме арқылы жолаушы өзінің жеке веб-парақшасына өтеді. Бұл үшін қайта тіркелудің немесе қосымша мәліметтер енгізудің қажеті жоқ.

Парақшада нақты рейске, билетке және өзгерістің сипатына қарай жолаушыға қолжетімді нұсқалар автоматты түрде көрсетіледі.

Жағдайға байланысты жолаушы:

• «Жаңа уақытты қабылдау» – рейстің басқа уақытқа ауыстырылғанын растау,
• «Басқа уақытқа немесе күнге ауыстыру» – балама рейс таңдау,
• «Ақшаны қайтару» – егер әуе компаниясының ережесінде қарастырылған болса, билетті қайтару мүмкіндіктерінің бірін таңдай алады.

Әуе компаниясының мәліметінше, бұл жекелендірілген сервисті FlyArystan билетін қай арна арқылы сатып алғанына қарамастан, барлық жолаушы пайдалана алады.

Оқи отырыңыз:

• Қазақстаннан Дубайға ұшатын рейстер қыркүйек айының соңына дейін тоқтатылды
• FlyArystan компаниясының басшысы ауысады
• FlyArystan Дубайға ұшатын рейстерін жаз бойы тоқтатты