FlyArystan Дубайға ұшатын рейстерін жаз бойы тоқтатты

Қазақстандық лоукостер FlyArystan Ақтау – Дубай – Ақтау бағыты бойынша рейстерді уақытша тоқтататынын мәлімдеді, деп хабарлайды Orda.kz.      

Шектеулер 2026 жылғы 29 тамызды қоса алғанда күшінде болады.

Әуе тасымалдаушының баспасөз қызметінің түсіндіруінше, бұл шешім Таяу Шығыстағы тұрақсыз геосаяси жағдайға байланысты қабылданған. Компания үшін жолаушылар мен экипаж қауіпсіздігі басты басымдық болып қала береді.

Әуе компаниясы хабарлағандай, рейстері тоқтатылған клиенттерге билет құны толық көлемде, ешқандай айыппұлсыз қайтарылады.

•  Егер билет FlyArystan сайты немесе қосымшасы арқылы сатып алынған болса: қайтаруға өтінішті жеке кабинет арқылы өз бетінше беруге болады.
• Егер билет туристік агенттіктер немесе үшінші тарап сервистері арқылы алынған болса: сатып алынған жерге жүгіну қажет.

 Ақтау – Дубай бағыты әдетте жаз мезгілінде ең сұранысқа ие бағыттардың бірі саналады. Алайда өңірдегі жағдайдың шиеленісуі әуе тасымалдаушыларын ұшу бағдарламаларын өзгертуге мәжбүр етуде. Бұған дейін басқа да халықаралық әуе компаниялары бағыттарды өзгерту және рейстерді тоқтату сияқты ұқсас шаралар қабылдаған болатын.

Оқи отырыңыз:

• Алматы - Нью-Йорк: 2026 жылы тікелей рейс іске қосылады
• Алматы - Минск бағыты бойынша жаңа рейс ашылды
• FlyArystan рейс уақытын өзгертіп, кейін жолаушыны айыппұл төлеуге мәжбүрлеген