Екі ел арасындағы әріптестікке 30 жыл: Путин мен Си Цзиньпин Қытайда не шешті?

19 мамыр кешінде Кремльдің баспасөз қызметі Владимир Путиннің Қытайға Си Цзиньпиннің шақыруымен ресми сапармен келгенін хабарлады. Бейжің әуежайында оны Қытайдың сыртқы істер министрі қарсы алды, деп хабарлайды Orda.kz.       

«Ресей басшысының сапары мемлекетаралық байланыстардың негізін қалаған тату көршілік, достық және ынтымақтастық туралы шартқа қол қойылғанына 25 жыл толуына орайластырылған» деп мәлімдеді Кремль.

Путиннің жоспарында Си Цзиньпинмен екіжақты ынтымақтастықты одан әрі дамыту, сондай-ақ халықаралық және өңірлік мәселелерді талқылау болды.

Алдымен көшбасшылар шағын құрамда келіссөз жүргізіп, кейін кездесу кеңейтілген форматта жалғасты. Путиннің айтуынша, соңғы 25 жылда Ресей мен Қытай арасындағы тауар айналымы 30 есеге артқан. Жалпы алғанда, екі ел арасындағы қатынас «бұрын-соңды болмаған деңгейге» жеткен.

Өз кезегінде Си Цзиньпин биыл Қытай мен Ресей арасындағы әріптестік және стратегиялық өзара іс-қимыл орнағанына 30 жыл толатынын атап өтті.

«БҰҰ Қауіпсіздік кеңесінің тұрақты мүшелері әрі әлемдегі ірі мемлекеттер ретінде Қытай мен Ресей ұзақ мерзімді стратегиялық көзқарасқа сүйене отырып, жоғары сапалы жан-жақты ынтымақтастық арқылы елдеріміздің дамуына серпін беруі және жаһандық басқарудың әділ жүйесін қалыптастыруға ықпал етуі тиіс», – деді ол. 

Келіссөз аяқталғаннан кейін екі ел басшылары баспасөзге мәлімдеме жасады. Кездесу барысында Путин мен Си қазіргі геосаяси жағдайдың негізгі мәселелерін талқылады.

Си Цзиньпин Таяу Шығыстағы жағдайдың «соғыстан бейбітшілікке өтудің шешуші кезеңінде» тұрғанын айтты.

«Әскери қимылдарды толық тоқтату кейінге қалдыруды көтермейді, ал қақтығыстың қайта өршуіне мүлде жол беруге болмайды», – деді ол.

Си Цзиньпиннің пікірінше, Ресей мен Қытай БҰҰ, ШЫҰ, БРИКС, АТЭС сияқты көпжақты алаңдардағы өзара іс-қимылды күшейтіп, Жаһандық Оңтүстік елдерін біріктіруі қажет. Тараптар сондай-ақ Украинадағы дағдарыстың түпкі себептерін БҰҰ Жарғысының қағидаттарын толық сақтай отырып жою қажеттігін атап өтті.

Бұдан бөлек, тараптар Жапонияның қайта қарулануына және ядролық материалдарды жинақтауына алаңдаушылық білдірді. Сондай-ақ КХДР-ды оқшаулауға және НАТО-ның Азия-Тынық мұхиты аймағындағы кеңеюіне қарсы шықты.

Ресей президентінің баспасөз хатшысы Дмитрий Песков Ресей мен Қытай «Сібір күші – 2» газ құбыры жобасының негізгі параметрлері бойынша ортақ түсіністікке келгенін мәлімдеді. Оның айтуынша, тараптар бағыт пен құрылыс мәселелері бойынша келісімге келген, енді тек кейбір нақтылаулар қалды. Келіссөз барысында екі ел көлік, энергетика және жоғары технологиялар салаларында ынтымақтастықты кеңейтуге уағдаласты.

Тараптар көлік интеграциясын да дамытуды көздеп отыр. Атап айтқанда, Солтүстік теңіз жолы, Қытай – Еуропа бағыты, Транссібір және БАМ магистральдарын жаңғырту, шекара өткелдерінің тәулік бойы жұмыс істеуі және ұшқышсыз көлік енгізу мәселелері қарастырылуда.

Еске салсақ , бұған дейін Ақорда Владимир Путиннің Қазақстанға мемлекеттік сапары жоспарланып отырғанын хабарлаған еді. Сапар мамыр айының соңында өтіп, оның мақсаты екі ел арасындағы стратегиялық әріптестік пен одақтастық қатынастарды нығайту болмақ.

Оқи отырыңыз:

• Си Цзиньпин мен Путиннің Бейжіңдегі кездесуі басталды
• Си Цзиньпиннің шақыруымен Владимир Путин 19–20 мамыр күндері Қытайға ресми сапармен барады
• Путин мен Зеленский кездесетін жерді шеше алмай әлек