Депутат әлеуметтік желідегі пікірлер үшін сотталғандарға амнистия беруді сұрады

Ләззат Нұрсапақызы
cover Сурет ЖИ көмегімен жасалды

Мәжіліс депутаты Ринат Зайытов әлеуметтік желілердегі пікірлері үшін сотталған азаматтарды амнистия тізіміне енгізуді сұрады, деп хабарлайды Orda.kz.

Оның айтуынша, парламент амнистияны Қазақстанның халықаралық аренадағы беделін нығайту құралы ретінде пайдалана алады.

«Жұмыс тобы отырыстары барысында біз көптеген пікір айтып, бірқатар ұсыныс енгіздік. Өкінішке қарай, құзырлы органдар оларды қолдамады, бірақ біз өз тарапымыздан әрекет еттік. Қазақстанда ықпалды парламент қағидаты бар. Ықпалды парламент — мықты президенттің бір факторы. Бүгін парламенттің біздің президентіміз бен еліміздің халықаралық аренадағы беделін нығайтуға мүмкіндігі бар», – деді Зайытов. 

Сондай-ақ ол әріптестерін ҚР Қылмыстық кодексінің 274-бабы бойынша жауапқа тартылып жатқан адамдарға амнистия қолдануды қолдауға шақырды.

«Құрметті әріптестер, менің жалғыз өтінішім — мас болып құқық бұзушылық жасағандарға немесе соған ұқсас басқа санаттарға амнистия беру емес. Бізде әлеуметтік желілердегі пікірлері үшін сотталып жатқан адамдар бар. Баршаңызды сол азаматтардың ҚР ҚК-нің 274-бабы бойынша амнистияға ілігуіне көмектесуге шақырамын», – деді депутат. 

Еске салайық, Қылмыстық кодекстің 274-бабы көрінеу жалған ақпарат тарату үшін жауапкершілікті көздейді. Соңғы жылдары бұл бап журналистер мен редакцияларға қатысты бірнеше рет қолданылған. Мәселен, 2025 жылдың желтоқсанында «ҚазТАГ» бас редакторы Әмір Қасенов ұсталды. Ал биыл наурыз айында осы бап бойынша журналист Ботагөз Омарова тергеуге ілінді.

Еске салсақ, 3 маусымда мақұлданған заң жобасына сәйкес, қылмыстық теріс қылықтар мен онша ауыр емес қылмыстар жасаған, сондай-ақ залал келтіруге алып келмеген не оны толық өтеген орташа ауырлықтағы қылмыс жасаған адамдарға қылмыстық рақымшылық қолданылады.

Аталған санаттар бойынша қылмыстық істерді, оның ішінде соттардың қарауындағы істерді тоқтату, жазадан босату немесе жазаның өтелмеген мерзімін қысқарту көзделіп отыр.

Сондай-ақ теріс мінез-құлқы болмаған жағдайда, келтірілген залалдың өтелуіне немесе өтелмеуіне қарамастан, орташа ауырлықтағы қылмыс жасаған және жазасын өтеу мерзімінің аяқталуына бір жылдан аспайтын уақыт қалған сотталушылар жазадан босатылуы мүмкін.

Қазақстанда әлеуметтік желілердегі жарияланымдар үшін жауапкершілік мәселесі соңғы жылдары ерекше өзекті тақырыпқа айналды. Бұрын интернеттегі пікірлер мен жазбалар еркін ой білдіру алаңы ретінде қабылданса, бүгінде олар заң тұрғысынан нақты бағаланып, құқықтық салдары бар әрекет ретінде қарастырылады.  Orda.kz тілшісінің  әлеуметтік желідегі қандай пікірлер үшін нақты жаза тағайындалуы мүмкін екені туралы зерттеу мақаласын мына жерден оқи аласыз.

Оқи отырыңыз:

Жаңалықтар

барлық жаңалықтар

22.12.2020 жылы берілген
№KZ05VPY00030397 мерзімді баспасөз басылым және ақпараттық агенттік
тіркеу туралы куәлік.

© ORDA, . Пайдалану ережелері