Депутат мас жүргізушілерге рақымшылық жасауға қарсы шықты

Мәжіліс депутаты Айдос Сарым жүргізуші куәлігінен айырылған азаматтарды рақымшылық тетіктеріне қосудан бас тарту керектігін мәлімдеді, деп хабарлайды Orda.kz.

Депутаттық сауалда Алматы қаласындағы әл-Фараби даңғылында болған қайғылы жол апаты негізге алынып мас болып көлік жүргізіп, адам өліміне әкелгендерге қатысты жауапкершілікті қайта қарау қажеттігі көтерілді.  Депутат жүргізуші куәлігінен айырылған азаматтарды рақымшылыққа іліктіру бастамасына үзілді-кесілді қарсы екенін жеткізді. 

«Жүргізуші куәлігінен айырылғандар кімдер? Басым көпшілігі — заңды жүйелі түрде бұзғандар, мас болып немесе өзге де елітуші заттардың әсерімен көлік тізгіндегендер, жол қозғалысы ережелерін елемегендер және сол арқылы айналасындағылардың қауіпсіздігіне қатер төндіргендер. Бұлар жай ғана зиянсыз құқық бұзушылар емес, бұлар — әлеуетті кісі өлтірушілер. Бұлар — бір кездері өз әрекетімен өзгенің денсаулығы мен тағдырын қатерге тіккендер. Рақымшылық аясында оларға жүргізу құқығын қайтару арқылы біз, шын мәнінде, ертең-ақ оларға біреудің өміріне қайтадан қауіп төндіруге екінші мүмкіндік береміз. Біз жаңа қасіреттердің қаупін саналы түрде арттырамыз», — деді Айдос Сарым.

Депутаттар рақымшылық туралы заңды талқылау кезінде негізгі өлшем халықтың қауіпсіздігі болуы керек екенін атап өтті. Олардың пайымынша, егер қандай да бір шешім азаматтардың өмірін қауіпсіз ете алмаса, онда ондай бастамаға жол беруге болмайды.

Оқи отырыңыз:

• Қазақстанда 2025 жылы 1000-нан астам жол апаты тіркелген
• Ұлттық банк төрағасы долларға қарағанда теңгеге көп сенім артатынын айтты