Дәрілерді бақылаусыз қолдану ұлттық қауіпсіздікке қатер: Антибиотик сату қатаңдайды

Қазақстанның Денсаулық сақтау министрлігі антибиотиктерді қолдану тәртібіне бақылауды күшейтуді және бактериялардың микробқа қарсы препараттарға төзімділігімен күресуді жоспарлап отырғанын мәлімдеді, деп хабарлайды Orda.kz.        

Денсаулық сақтау саласының басшылары дәрілерді бақылаусыз қолдану ұлттық қауіпсіздікке қауіп төндіре бастағанын айтады.

Министрлік дерегінше, әлемде жыл сайын антибиотикке төзімді микроорганизмдер тудырған инфекциялардан шамамен 700 мың адам қайтыс болады. Дүниежүзілік денсаулық сақтау ұйымы болжамынша, 2050 жылға қарай бұл көрсеткіш 40 миллионға жетуі мүмкін.

Ұлттық қоғамдық денсаулық сақтау орталығы басқарма төрағасы Эрик Байжүнісов антимикробтық төзімділік бүгінде тек медициналық мәселе шеңберінен шығып кеткенін атап өтті.

«Антимикробтық төзімділік денсаулық сақтау саласындағы ұлттық қауіпсіздік мәселесіне айналып отыр», — деді ол. 

Орталық мәліметінше, Қазақстан антибиотиктерді тұтыну құрылымы бойынша ДДСҰ ұсынған көрсеткіштерге әлі жете алмай отыр. Мысалы, негізгі және жиі кездесетін инфекцияларды емдеуге ұсынылатын Access тобы препараттарының үлесі небәрі 38,3%, ал ұсынылатын деңгей кемінде 70% болуы тиіс. Сонымен қатар, қолданылуы бактериялардың төзімділігін арттыру қаупіне қатысты Watch тобы антибиотиктерін тұтыну деңгейі жоғары болып отыр.

Шенеуніктерді ерекше алаңдататыны — антибактериалды препараттардың рецептсіз, оның ішінде онлайн сервистер мен цифрлық платформалар арқылы еркін сатылуы. Министрлік мұндай тәжірибе өзін-өзі емдеудің көбеюіне және антибиотикке төзімділіктің артуына әкеледі деп санайды.

Сонымен қатар, антимикробтық төзімділік мәселесі медициналық жоғары оқу орындарының бакалавриат, магистратура, резидентура және докторантура бағдарламаларына енгізілмек.

Бұдан бөлек, министрлік эпидемиологиялық бақылауды кеңейтіп, Қазақстанның Ауыл шаруашылығы министрлігі және экологиялық қызметтермен өзара іс-қимылды күшейтуді көздеп отыр. Өңірлерде микробиологиялық зертханаларды жабдықтауға және мамандар даярлауға ерекше назар аударылады.

Айта кетейік, бұған дейін Қазақстанда рецептсіз берілетін барлық дәрілердің бағасы толықтай еркін жіберілген болатын.

Оқи отырыңыз:

• ҚР ДСМ ауруханалар мен емханаларды жаппай тексереді
• ДСМ қазақстандықтарға хантавирус қаупіне қатысты ескерту жасады
• Атышулы «Алтын Орда» базарындағы тексеру қорытындысы: Үстеме 85 пайыздан асып кеткен