Атышулы «Алтын Орда» базарындағы тексеру қорытындысы: Үстеме 85 пайыздан асып кеткен

Қазақстанның Сауда және интеграция министрлігі Алматы облысындағы Алтын Орда базары аумағында әлеуметтік маңызы бар азық-түлік тауарларының бағасын қалыптастыруда бірқатар заңбұзушылықтарды анықтады, деп хабарлайды Orda.kz.         

Кейбір жағдайларда сауда үстемесі 85 пайыздан асып кеткен.

Министрліктің мәліметінше, «Омаров» ЖК, Iceberg Distribution ЖШС және «Ар Диас» ЖШС әлеуметтік маңызы бар тауарларды төмен бағамен сатып алып, оларды басқа сауда субъектілеріне 17%-дан 86%-ға дейін негізсіз үстемемен қайта сатқан.

Аталған фактілер бойынша жоспардан тыс тексеру жүргізіліп, олардың қорытындысы бойынша заңбұзушыларға әкімшілік шаралар қолданылып, айыппұл салынды.

Жалпы, Сауда министрлігінің дерегіне сүйенсек, жыл басынан бері жүргізілген тексерулер нәтижесінде бір сауда желісі, бір көтерме сауда алаңы және 11 сауда субъектісі әлеуметтік маңызы бар азық-түлік тауарларына 40%-дан 203,8%-ға дейін негізсіз үстеме қосқаны анықталған.

Сонымен қатар, өңірлік комиссия «Алтын Орда» базарындағы 13 сауда субъектісіне жоспардан тыс тексеру жүргізіп, нәтижесінде жеткізу тізбегінен 7 тиімсіз делдалды алып тастаған.

Мемлекеттік кірістер органдарынан алынған электронды шот-фактураларды талдау барысында да әлеуметтік маңызы бар тауарларды сатумен айналысатын бірқатар ірі сауда субъектілерінде заңбұзушылықтар анықталғаны белгілі болды.

Оқи отырыңыз:

• «Алтын Орда» базарының жаңа әкімшілігі салафизм туралы ақпаратты жоққа шығарды
• «Алтын Орда» қожайыны базарды кәсіпкер Әлпиевке жалға беруден бас тартты
• Алпауыттардың Алтын Орда үшін шайқасы