Иран: АҚШ-қа 20 млрд доллардан астам шығын келтірдік

Иранның Ислам революциясы сақшылар корпусы (КСИР) АҚШ-пен қақтығыс кезінде америкалық әскери нысандарға 20 миллиард доллардан астам шығын келтіргенін мәлімдеді.

КСИР (ИРСК) өкілі Хосейн Мохебидің Tasnim агенттігіне айтуынша, 8–22 шілде аралығында Иранның соққылары нәтижесінде АҚШ-тың әскери техникасы мен инфрақұрылымына орасан зиян келген. Бұл баға америкалық әскери техниканың нарықтық құны, Пентагонның бюджет құжаттары және инфрақұрылымды қалпына келтіру шығындары негізінде есептелген.

Мохебидің сөзінше, осы кезеңде:

• 11 америкалық жойғыш ұшақ пен тікұшақ;
• 17 барлау және операциялық дрон;
• ангардағы F-15 жойғышы;
• P-8 патрульдік ұшағы;
• C-17 әскери-көлік ұшағы;
• 8 әуе жанармай құю ұшағы жойылған.

Сондай-ақ КСИР өкілі Иран шабуылдарының салдарынан 200-ден астам америкалық әскери қызметкер қаза тапқанын, ал жараланғандар саны бұдан әлдеқайда көп екенін айтты.

Оның мәлімдеуінше, операция әлі де жалғасып жатыр және АҚШ-тың Таяу Шығыстағы әскери қатысуына байланысты нысандарға бағытталған.

Еске салсақ, 8 шілдеде АҚШ президенті Дональд Трамп 18 маусымда күшіне енген бітімнің аяқталғанын жариялаған болатын. Осыдан кейін АҚШ әскері 13 түн қатарынан Иран аумағына соққы жасады. Бұған жауап ретінде Тегеран Таяу Шығыстағы америкалық әскери базаларға шабуылдар ұйымдастырды.

Кейінірек АҚШ Иранға соққыларды тоқтататынын мәлімдеді. Осыдан соң Тегеран да жауап операцияларын уақытша тоқтатқанын хабарлады.

Ескертейік, жоғарыдағы мәліметтердің барлығы Иранның КСИР өкілінің мәлімдемесіне негізделген. АҚШ тарабы бұл шығындар мен адам шығыны туралы ақпаратты ресми түрде растаған жоқ.

Оқи отырыңыз:

• Трамп Иранға жасалатын соққыны тоқтатуға бұйрық берді
• АҚШ Иран уранын қолға түсіру үшін күрделі операция дайындап жатыр – БАҚ