Боралдайда сушидан 19 адам уланып, аруханаға түсті

Алматы облысының Боралдай кентінде орналасқан қоғамдық тамақтану орнында 19 адам тағамнан улану белгілерімен ауруханаға жеткізілді. Олардың барлығы «Алатау» базары аумағындағы Sushi Time дәмханасы өнімдерін тұтынғаны анықталды, деп хабарлайды Orda.kz.

Оқиға туралы алғашқы хабарламалар түскеннен кейін санитарлық-эпидемиологиялық қызмет, денсаулық сақтау мекемелері мен жергілікті атқарушы органдар шұғыл түрде жұмылдырылды.

Іле аудандық санитарлық-эпидемиологиялық бақылау басқармасы  Orda.kz редакциясына пікір білдіріп, тексеру жұмыстары жүргізіліп жатқанын хабарлады. Мамандар тағам өнімдерінен сынама алып, оларды зертханалық сараптамаға жіберген.

Оқиғаның барлық мән-жайы анықталғанға дейін Sushi Time қоғамдық тамақтану орнының қызметі уақытша тоқтатылды.

Санитарлық қызметтің мәліметінше, тағамнан уланудың нақты себептері зертханалық зерттеулер аяқталғаннан кейін белгілі болады. Тексеру нәтижелері бойынша қосымша ақпарат жарияланады. Мамандар тұрғындарды қоғамдық тамақтану орындарын таңдауда мұқият болуға шақырды.

«Жаз мезгілінде қоғамдық тамақтану орындарының санитарлық жағдайына ерекше назар аудару қажет. Сондай-ақ тағам өнімдерінің  талаптарының сақталуына мән берген жөн. Егер құсу, диарея немесе дене қызуының көтерілуі сияқты белгілер байқалса, өздігінен емделмей, дереу медициналық көмекке жүгінген дұрыс»,  деп хабарлады Іле аудандық санитарлық-эпидемиологиялық бақылау басқармасы.

Қазір зардап шеккендердің жағдайы дәрігерлердің бақылауында. Ал қоғамдық тамақтану орнындағы өнімдер мен санитарлық талаптардың сақталуына қатысты тексеру жалғасып жатыр. Зертханалық сараптама қорытындылары шыққаннан кейін уланудың нақты себебі белгілі болады.

Оқи отырыңыз: 

• Павлодар облысының тұрғыны өзінің үш жасар қызын өзгеден деген күмәнмен азаптап өлтіріп, өмір бойына сотталды
• Жазушы Өтебай Қанахиннің немересінің өлімі қоғамдық резонанс пен депутаттың қозғау салуынан кейін ғана алға жылжыды