Бибісара Асаубаева Спорт министрлігінің жауабына наразы болып, Тоқаевтың бағытын еске салды

Әлемге танымал қазақстандық шахматшы Бибісара Асаубаева Қазақстан президенті Қасым-Жомарт Тоқаевтың интеллект туралы айтқан сөзін келтіріп, Туризм және спорт министрлігіне жауап берді, деп хабарлайды Orda.kz.       

«Интеллект басымдықта емес пе? Мен Спорт министрлігінің ресми жауабын мұқият оқып шықтым. «Шахмат – басым емес спорт түріне жатады». Шынымды айтсам, бұл сөйлемді бірнеше рет қайта оқыдым. Жуырда ғана Қазақстан президенті Қ.Қ.Тоқаев елдің стратегиялық бағытын айқындап берген еді: «Қуатты ұлт – мықты интеллекттен басталады. XXI ғасырда басты ресурс – шикізат емес, білім» деп жазды Асаубаева әлеуметтік желідегі парақшасында, министрліктің спортшыға төленген төлемдер туралы мәлімдемесіне жауап ретінде. 

Ол әлемнің жетекші елдерінде шахмат тек спорт емес екенін атап өтті.

«Бұл – стратегиялық ойлау, зияткерлік капитал және мемлекеттің бәсекеге қабілеттілігінің бір белгісі. Егер шахмат басымдыққа ие болмаса, онда қарапайым сұрақ туындайды. Сонда президент мені «Барыс» орденінің II және III дәрежелерімен қандай еңбегім үшін марапаттады? Қазіргі таңда мен әлемдік рейтингте 5-орындамын. Спорт министрлігінің жауабынан шығатын қарапайым қорытынды – менің ата-анам, шенеунік емес, елдің зияткерлік болашағына инвестиция салып отырған нағыз патриоттар. Қазақстанның болашағын интеллект, білім, ғылым және адами капитал сапасы айқындайды. Маңызды мәселе – министрліктің ұстанымы Президенттің бағытына сәйкес келе ме? Себебі шахматқа деген көзқарас – интеллектке деген көзқарас. Ал интеллектке деген көзқарас – елдің болашағына деген көзқарас. Сірә, спорт министрі басқа бағытты ұстанатын сияқты» деп қосты Асаубаева. 

Бұған дейін Асаубаева Президент Қасым-Жомарт Тоқаевқа жолдаған үндеуінде өз жалақысының үш есеге қысқарғанын, ал Шахмат федерациясы оған мүлде жалақы төлемегенін айтқан болатын.

Одан бұрын белгілі шахматшы Бибісара Асаубаеваның анасы Лиана Таңжарықова  Қазақстан шахмат федерациясын сынға алып, спортшылардың тұрақты жалақыдан қағылғанын мәлімдеген болатын.      

Таңжарықованың айтуынша, Тимур Турлов басшылыққа келгеннен кейін спортшылар бұрынғы ай сайынғы еңбекақысынан толық айырылып, тек грантқа қарап қалған.

Вице-министр Серік Жарасбаевтың түсіндіруінше, 2025 жылғы заңнамалық өзгерістерге байланысты шахмат олимпиадалық спорт түрлерімен теңестірілмейді. Соған орай тарифтік тор өзгеретіндіктен, спортшының жалақысы 1 миллионнан шамамен 300 мың теңгеге дейін қысқарған.

Дегенмен, вице-министр Асаубаеваға бөлінетін қаражат көлемі керісінше жыл сайын өсіп жатқанын алға тартты. Биыл халықаралық жарыстарға дайындық үшін қордан 100 миллион теңге, ал үш жылдың сомасын қосқанда жалпы 243 миллионға жуық теңге бөлінген. Серік Жарасбаевтың сөзінше, бұл қаражат жоғары деңгейде өнер көрсетуге толық жетеді.

Оқи отырыңыз:

• Шахматшы Бибісараға қатысты дауға министрлік жауап берді
• Қазақстандық шахматшы Бибісара Асаубаева президенттен көмек сұрады
• Әлемге танымал шахматшы Бибісараның анасы даулы мәлімдеме жасады