Бетіне доп тиіп, жарақат алған ақтөбелік жанкүйер Наниден жейде мен екі абонемент алды

«Ақтөбе» футбол клубының басшылығы мен ойыншылары Қазақстан кубогы аясында «Алтайға» қарсы өткен матч кезінде жарақат алған жанкүйермен кездесті. Оқиға орталық стадионда болған, доп трибунаға ұшып барып, әйелдің бетіне тиген, деп хабарлайды Orda.

Зардап шеккен әйел жабық бас-ми жарақатын алып, миы шайқалып, беті қанап, оны тігуге тура келгені туралы жазған болатынбыз. Ол бас қатты ауырып,  ұйқысы қашқанына шағымданған болатын.

Бұған дейін әйел әлеуметтік желілерде стадионда қорғаныш торының жоқтығына наразылық білдірген. Осы мәлімдемеден кейін клуб басшылығы оны «Ақтөбе» ФК кеңсесіне шақырды.

«Кездесу барысында тараптар жағдайды талқылап, өзара түсіністікке келді. Біз, үй матчтарын ұйымдастырушылар ретінде, көрермендердің қауіпсіздігіне жауаптымыз және стадиондағы қауіпсіздік шараларын күшейту жұмыстарын жалғастыруға ниеттіміз», – деп атап өтті клубтың баспасөз қызметі. 

Клуб кеңсесінде әйелге португалиялық футболшы Луиш Нанимен кездесу ұйымдастырылды. Легионер оған қолтаңбасы бар жейде сыйлады, ал клуб өз кезегінде қауіпсіздеу аймақтағы орындардан екі абонемент беруге уәде етті.

Еске салсақ, Қазақстанда жоғары лиганың кәсіби футбол клубтарын ауқымды жекешелендіру жүріп жатыр, оның мақсаты — мемлекеттік қаржыландырудан жеке инвестицияларға көшу.  Orda.kz тілшісі осы футбол клубтарының жекелендіру жағдайын зерделеп,  мына жерде назарларыңызға ұсынады.     

Оқи отырыңыз:

• «Ақтөбе» ФК матчына барған әйелдің бетіне доп тиіп, миы шайқалды
• Еліміздің кәсіби футбол клубтарын жекешелендіру қалай жүріп жатыр?
• «Ақтөбе» ФК ресми түрде мәлімдеді: Нани Love Айкамен кездеспейді