Банкроттыққа өтініш беру қашан басталатыны белгілі болды

Наурыз айынан бастап қазақстандықтар өздерін банкрот деп жариялай алады. Бұл туралы премьер-министрдің орынбасары – қаржы министрі Ерұлан Жамаубаев мәлімдеді.

Министр 30 желтоқсанда «Қазақстан Республикасы азаматтарының төлем қабілеттілігін қалпына келтіру және банкроттығы туралы» заңға қол қойылғанын еске салды. Заң 1 қаңтарда ресми түрде жарияланды.

- 3 наурыздан бастап банкроттық туралы өтініштерді қабылдау басталады, - деді Жамаубаев үкімет отырысында.

Оның айтуынша, халықаралық тәжірибені ескере отырып, заңда 3 түрлі рәсім көзделген. Бірінші рәсім - соттан тыс банкроттық. Оны тек банктер, микроқаржы ұйымдары және коллекторлық агенттіктер алдындағы қарыздар бойынша қолдануға болады.

Мына шарттар сақталуы қажет:

• борыш 5,5 млн теңгеден (1600 АЕК) аспайды;
• кредит 12 ай бойы өтелмеген болса;
• меншігінде тіркелген мүлік, оның ішінде ортақ меншіктегі мүлік болмаған жағдайда;
• банкпен реттеу жүргізілгеннен кейін.

Бұл ретте атаулы әлеуметтік көмек алушылар үшін 6 ай ішінде және берешегі 5 жылдан артық өтелмеген азаматтар үшін ерекше жағдайлар көзделген.

- Соттан тыс банкроттық «электронды үкімет» порталында басталады. Содан кейін ақпарат жүйесі арқылы борышкердің критерийлерге сәйкестігі тұрғысынан мемлекеттік органдардың деректерімен автоматты түрде салыстыру жүргізіледі, - деді ол.

Екінші рәсім - сот банкроттығы. Сот банкроттығының мақсаты – банкроттың мүлкі есебінен кредиторлардың талаптарын барынша қанағаттандыру. Бұл рәсімді қаржы басқарушылары жүзеге асырады, олардың құрамына жұмыс істеп тұрған әкімшілер, кәсіби есепшілер, заң кеңесшілері мен аудиторлар кіреді.

Үшінші рәсім, бұл - төлем қабілеттілігін қалпына келтіру, онда сот арқылы борышты бөліп-бөліп төлеу (5 жылға дейін) мүмкіндігі көзделеді. Оның артықшылығы - азамат «банкрот» деп саналмайды. Демек, банкрот үшін көзделген салдарлар оған қолданылмайды.