Балқашта 8 жастағы баланы соққыға жыққан «Қазақмыс» қызметкері екі айға қамалды

Балқашта баланы ұрып-соғып, азаптады деген күдікке ілінген «Қазақмыс» қызметкері екі айға қамауға алынды, деп хабарлайды Orda.kz. 

Қарағанды облысының полиция департаменті 8 жастағы баланы қорлаған ер адамның ұсталып, қамалғанын мәлімдеді. 

Айта кетейік, 4 тамызда Балқаш тұрғыны 8 жастағы баласын «Қазақмыс» қызметкері соққыға жыққанын айтты. Полиция «кәмелетке толмаған балаға дене жарақатын келтіру» фактісі бойынша сотқа дейінгі тергеуді бастады.

Көп ұзамай ер адам өзінің туған қызымен осы баланың жыныстық қатынас жасауға тырысқанын мәлімдеді. Полиция екі тараптың нұсқалары мен дәлелдерін тексеріп жатқанын атап өтті.

Бала құқықтары жөніндегі уәкіл Динара Зәкиева баланың анасымен байланыста екенін айтты. Күдікті жұмыс істейтін «Қазақмыс» компаниясы да бұл оқиғаға түсініктеме беріп, тергеуге жан-жақты жәрдемдесуге уәде берді.

Айта кетейік, Алматыда жеке балабақшада 4 жасар баланы тұншықтырған тәрбиешіге қатысты сот отырысы өтіп жатыр. Айыпты әйел сот залында көзіне жас алып, баланың әкесінен кешірім сұрады.