«4 жастағы қызыма жыныстық емеурін көрсетті»: Балқашта 8 жастағы баланы ұрып-соққан ер адам өз нұсқасын айтты

Балқашта 8 жастағы баланың соққыға жығылуына қатысты жаңа мәліметтер пайда болды. Баланы ұрып-соққан ер адамның нұсқасы бойынша, жас бала төрт жастағы қызына қатысты жыныстық сипаттағы әрекеттер жасаған екен, деп хабарлайды Orda.kz. 

Ер адам балалар тамақтанғаннан кейін планшет қарауға кеткенін айтты. Ал ол сол уақытта үстел үстін тазалап қалған. 10-15 минуттан кейін ер адам балалар отырған бөлменің жанынан өтіп бара жатып қызын киімсіз көреді. Ал 8 жасар баланы шалбары түсіріліп тұрғанын көрген. 

Ер адам сол мезетте ашуға ерік беріп, баланы ұрып-соққан. Ол тіпті өзі не істегенін де білмей қалған. Төрт жастағы қыздың әкесі «ұят болады» деп полицияға жүгінбепті. Ол жанжал шығарғысы келмейтінін, тіпті зардап шеккен баланың отбасына емделуге ақша бергісі келетінін айтты. Алайда баланың анасы оқиғаны көпшілікке жария етіп жіберген. 

Қарағанды облысының полициясы Балқашта 8 жастағы баланы ұрып-соқты деген күдікке ілінген ер адамның мәлімдемесіне түсініктеме берді. Енді полиция ер адамның «4 жастағы қызыма тиісті» деген нұсқасын тексермек. Ведомство кәмелетке толмаған адамға дене жарақатын келтіру фактісі бойынша сотқа дейінгі тергеу амалын жүргізіп жатыр. Ер адам уақытша ұстау изоляторына қамалды. Тергеу полиция департаменті басшылығының ерекше бақылауында. 

Айта кетейік, бұған дейін Балқаш қаласында «Қазақмыс» кәсіпорнының қызметкеріне 8 жастағы баланы соққыға жықты және азаптады деген айып тағылды.