Жалған мемлекеттік нөмір үшін қылмыстық жауапкершілік енгізілуі мүмкін

Депутат Бақытжан Базарбек 2026 жылғы 6 мамырда пленарлық отырыста жалған мемлекеттік нөмірлерді қолданғаны үшін жауапкершілікті күшейтуді ұсынды, деп хабарлайды Orda.kz.      

Ал Қазақстан ішкі істер министрлігі бұл мәселе қылмыстық заңнаманы қайта қарау аясында қарастырылып жатқанын мәлімдеді.

Депутат жалған нөмірлерді қолдану мәселесін көтеріп, мұндай жағдайлар жол-көлік оқиғаларынан кейін жиі анықталатынын және қоғамға үлкен қауіп төндіретінін атап өтті.

«Ұзақ уақыт бойы көптеген адамдар, оның ішінде ауқатты азаматтар мен олардың балалары жалған нөмірлерді қолданғаны анықталып жатыр. Бұл тек Алматыда ғана емес, басқа өңірлерде де кездеседі. Қарапайым адамдар зардап шегеді, бюджет қомақты қаржыдан айырылады. Мен Қылмыстық кодекстің 345–351-баптарын зерттедім — жол қозғалысы ережелерін бұзу бұл қатынастарды реттемейді. Ал 386-бап тек мемлекеттік нөмірлерді қолдан жасау мен сатуға жауапкершілік қарастырады. Ал жалған нөмірді пайдалану әкімшілік жауапкершілікке ғана жатады», — деді депутат

Оның айтуынша, қазіргі таңда бұл әрекет Қазақстан Әкімшілік құқық бұзушылық туралы кодексінің 590-бабы бойынша қаралады, онда бар болғаны 15 АЕК көлемінде айыппұл қарастырылған.

«15 АЕК деген не? Айыппұл төлеп, құтыла салады. Ал осының салдарынан адамдар қаза тауып жатыр. Қайталанса — 20 АЕК немесе бір жылға жүргізуші куәлігінен айырылады. Осындай жағдайда жауапкершілікті әкімшілік деңгейден қылмыстық деңгейге көтеретін уақыт келген жоқ па?», — деді Базарбек. 

Өз кезегінде ІІМ вице-министрі Санжар Әділов жалған нөмірлер көбіне қылмыстық әрекеттер кезінде қолданылатынын айтты.

«Бізде тиісті талдау бар. Жол-көлік оқиғаларына қатысты жалған нөмірлер қолданылған жағдайлар кездеседі. Қазір қылмыстық жауапкершілік тек оларды қолдан жасауға ғана қарастырылған. Сондықтан Қылмыстық кодекстің ресми құжаттарды қолдану бойынша нормаларына ұқсас түрде жалған нөмірді пайдалануды да қылмыстық жауапкершілікке енгізу қажеттігі бар», — деді ол. 

Оның айтуынша, бұл ұсыныс қаралып жатыр. Қазір қылмыстық заңнаманы қайта қарау аясында ғалым-заңгерлермен және мемлекеттік органдармен бірлесіп пысықталуда.

Бұған дейін Қазақстанда авто мектептерге қойылатын талаптарды күшейту жоспарланып отырғаны хабарланған еді.

Оқи отырыңыз:

• ІІМ жылдамдыққа қатысты «жаңа айыппұл» туралы ақпаратқа жауап берді
• Қазақстанда исламдық экономикаға қатысты шариғат кеңесін құру ұсынылды
• ІІМ автомектептерге тексеріс барысында 701 оқу тобы қызметін тоқтатты