Базарбек шенеуніктердің бос уәдесін сынады: ҚҚС жойылды, ұшақ билеті арзандады ма?

Депутат Бақытжан Базарбек авиаотын сатып алудан қосылған құн салығы (ҚҚС) алынып тасталғанына қарамастан, әуе билеттерінің арзандамағанын мәлімдеді. Ал билік бұл жеңілдіктің қажеттілігін дәл осы себеппен түсіндірген еді, деп хабарлайды Orda.kz.

Оның айтуынша, Салық кодексін талқылау кезінде үкімет өкілдері кодекс күшіне енгеннен кейін алты ай ішінде талдау жасап, мүмкін болатын түзетулермен келуге уәде берген. Алайда қазір, депутаттың сөзінше, пленарлық отырыста бұл мерзім бір жылға ұзартылатыны айтылып отыр.

«Қазір ешқандай талдау да, түзетулер де жоқ. Ал сіздер пленарлық отырыста бір жыл керек деп айтып отырсыздар. Жұмыс тобында айтқан сөздеріңізді ұмытқан жоқпыз, ол жерде бір нәрсе айтасыздар, мұнда мүлде басқа. Мен өз ұстанымымда қаламын. Салық кодексі аясында біз ҚҚС төлеуі тиіс тұлғаларды салықтан босатып, керісінше ҚҚС-ты босатылуы керек адамдарға жүктеп қойдық», – деді Базарбек ұлттық экономика вице-министрі Азамат Әмринге қарата.

Ол авиаотынды мысалға келтірді. Депутаттың айтуынша, билік ҚҚС-ты алып тастау 1 қаңтардан бастап әуе билеттерінің бағасын төмендетеді деп мәлімдеген. Алайда бұл орындалмаған.

«Сіздер авиаотын сатып алуды ҚҚС-тан босаттыңыздар. Мұны немен түсіндірдіңіздер? 1 қаңтардан бастап әуе билеттері күрт арзандайды дедіңіздер. Бірақ билеттер арзандамақ түгілі, қымбаттап кетті. Әуе компаниялары бұрын авиаотын үшін төлеп келген қаражатты өздеріне қалдырды. Бұл – өте үлкен қаражат, шамамен билет құнының 60–70 пайызы», – деді депутат. 

Ұлттық экономика вице-министрі Азамат Әмрин әуе билеттерінің арзандауы бұл жеңілдік мақсатының бірі болғанын мойындады. Оның айтуынша, бұл мәселе бақылауға алынып, қажет болған жағдайда жеңілдікті алып тастауға негіз болуы мүмкін.

«Рахмет, біз бұл мәселені бақылауға аламыз. Бұл жеңілдікті жою бастамасын көтеруге негіз болуы мүмкін. Сонымен қатар бюджет қалыптастыру кезінде қосымша кіріс әкелуі ықтимал», – деп жауап берді Әмрин. 

Сондай-ақ ол министрлік алты ай ішінде талдау жүргізу уәдесінен бас тартпайтынын айтты. Оның сөзінше, оңайлатылған декларация бойынша салық кезеңі алты айды құрайды, ал төлеу мерзімі – 25 тамыз. Осыдан кейін ведомство толыққанды талдау дайындай алады.

2026 жылдың сәуір айында Таяу Шығыстағы геосаяси шиеленіс салдарынан авиаотынның қымбаттауы әуе тасымалының өзіндік құнының өсуіне, билет бағасының қымбаттауына және қосымша жанармай алымдарының енгізілуіне әкелді.  Тілші сараптамасын мына жерден оқыңыз.     

Бұл жағдай Қазақстанда да әуе билеттері бағасының өсуі мүмкін деген алаңдаушылық туғызып отыр, ал туроператорлар бұрын брондалған турлар үшін қосымша төлем талап ете бастады.

Оқи отырыңыз:

• Авиотын қымбаттады: Әлем және Қазақстан нарығы қандай жағдайда?
• Бақытжан Базарбек: Олигархтарға «сот төрелігі» ерекше
• «Air Astana» мен «FlyArystan» авиаотын көлемі бойынша бұрмаланған мәлімет ұсынған