Бақытжан Базарбек өзі қағып кеткен адамға қатысты жаңа мәлімет берді

Мәжілістің бұрынғы депутаты Бақытжан Базарбек Жамбыл облысында өзі қатысқан жол апатынан кейінгі жағдай туралы өзінің әлеуметтік желідегі парақшасында айтып берді, деп хабарлайды Orda.kz.  

Бұрынғы мәжілісмен  Instagram парақшасында жол апатынан зардап шеккен азаматтың Құлан ауылындағы ауруханадан Тараз қалалық ауруханасына ауыстырылғанын хабарлады.

Бақытжан Базарбек науқасты тасымалдау сәтінен бейнежазба жариялап, 36 жастағы Нұржігіттің денсаулық жағдайында оң өзгерістер байқалғанын айтты.

Бұрынғы депутаттың сөзінше, 28 тамызда Нұржігіттің комада жатқанына 13 күн болған.

«Оның жағдайында бірқатар оң клиникалық өзгерістер бар. Олар туралы кейінірек айтып беремін», – деді ол. 

Бейнежазбада Базарбектің жанында зардап шеккен азаматтың анасы да болған. Олар Құланнан Таразға науқасты дәрігер-реаниматологтың сүйемелдеуімен жеткізетін жедел жәрдем көлігін бірге күткен.

Бақытжан Базарбектің айтуынша, тасымалдау сәтті өткен және науқастың жағдайы нашарламаған.

«Енді Нұржігітпен қаланың ең білікті реаниматологтары мен травматологтары айналысады», – деді бұрынғы мәжілісмен. 

Құрылтай депутаттарын сайлау күні Бақытжан Базарбек Құлан ауылындағы Орталық мәдениет үйінде орналасқан сайлау учаскесіне барып, дауыс берген. Ол Нұржігіттің жағдайы ауыр болғандықтан, оның жанында болу үшін Құлан ауылына уақытша тіркелгенін айтты.

«Маған жағдайы ауыр Нұржігіттің жанында болу қажет болғандықтан, Құлан ауылына келдім. Нұржігіт есін жиғанға дейін осында боламын. Мен Алматының Бостандық ауданында тіркелгендіктен, дауыс беру үшін уақытша тіркеуге тұрып, тиісті есептен шығару талонын алдым» деп жазды бұрынғы депутат. 

Енді Бақытжан Базарбектің Нұржігітпен бірге Таразда болуы мүмкін.

Еске салайық, 15 тамызда Жамбыл облысында 36 жастағы жаяу жүргіншінің қатысуымен жол-көлік оқиғасы болған. Оқиғадан кейін әлеуметтік желілерде көлік тізгінінде Мәжілістің бұрынғы депутаты Бақытжан Базарбек болуы мүмкін деген ақпарат тарады.

Алдын ала нұсқа бойынша, бұған дейін тасжолда көлік сиырмен соқтығысқан. Жол-көлік оқиғасынан кейін бір топ ер адам жолда жатқан малдың өлексесін алып тастауға әрекет жасаған. Солардың бірі кейіннен Rav-4 көлігінің астына түскен. Әлеуметтік желідегі мәліметтерде аталған көлікті Бақытжан Базарбек басқарғаны айтылған.

Зардап шеккен азамат ауруханаға жеткізілді. Полиция бұл факті бойынша қылмыстық іс қозғады. Кейін Бақытжан Базарбек жол апатына өзі қатысқанын растады. Сонымен қатар ол қоғамды асығыс қорытынды жасамауға шақырды.

Жамбыл облысының денсаулық сақтау басқармасы зардап шеккен азаматтың жансақтау бөлімінде жатқанын және оның жағдайы политравма мен жарақаттық шок салдарынан аса ауыр екенін хабарлаған.

Кейін Бақытжан Базарбек жол апатынан зардап шеккен азаматтың туыстарымен бірге түскен бейнежазбасын да жариялады. Қазіргі уақытта Нұржігіт Тараз қаласына жеткізіліп, білікті дәрігерлердің бақылауында. Оның денсаулығындағы оң өзгерістер дәрігерлер тарапынан әрі қарай бағаланатын болады.

Оқи отырыңыз:

• Бақытжан Базарбек жол апатынан зардап шеккен азаматтың туыстарымен бірге видео жариялады
• Бақытжан Базарбек Жамбыл облысында адам қағып кетті ме? Полиция не дейді?
• Экс-депутат Базарбек қағып кеткен адамның жағдайы белгілі болды