Атырау облысында 90 жастағы қарияны баласы ұрып-соғып, қамап ұстаған

Атырау облысы Қызылқоға ауданы Сағыз ауылында қарт адамға қатысты жанжал шықты. 90 жастағы зейнеткерді туған ұлының соққыға жығу фактісі бойынша қылмыстық іс қозғалды, деп хабарлайды Orda.kz.       

Әлеуметтік желілерде 90 жастағы қарияның қатыгездікке ұшырағаны туралы ақпарат пайда болды. 

Atyrau Today басылымының жазуынша, ер адам өз әкесін үйдің бір бөлмесіне қамап ұстап отырған. Зейнеткерге жеткілікті мөлшерде ас-су берілмегені, сондай-ақ қол-аяғы скотчпен байланғаны туралы мәлімет тараған. Дегенмен, қария амалын тауып қашып шығып үлгерген.

Туыстарының айтуынша, қарияның баласы бұрын ішкі істер органдарында жұмыс істеген. Хабарланғандай, қарт адам қайшы тауып алып, өз бетінше босап шыққан. Түнде баласы ұйықтап қалғанда ол үйдің терезесінен шығып, ағасының үйіне жетіп, көмек сұраған.

Туыстары бұл істі жан-жақты тергеп, кінәлілерді жауапкершілікке тартуды талап етті. 

Полиция 19 маусымда дене жарақатын келтіру фактісі бойынша «Соққы» бабымен қылмыстық іс қозғалғанын хабарлады.

Қазіргі уақытта оқиғаның барлық мән-жайын жан-жақты, толық әрі объективті анықтауға бағытталған қажетті тергеу әрекеттері жүргізіліп жатыр.

Еске салсақ, дәл осыған ұқсас жағдай Солтүстік Қазақстан облысы Шал ақын ауданы Бірлік ауылында болды. 22 жастағы жергілікті тұрғын 67 жастағы әкесін ұрып-соққаны аздай, оны бейнежазбаға түсіріп, әлеуметтік желіге таратқан. 

Оқи отырыңыз:

• Қарт әкесін сабап, оны видеоға түсіріп таратқан «батыр бала» бес тәулікке қамалды
• Шілде айынан бастап Қазақстанда әскерге шақыру цифрландырылады
• Алматының Райымбек даңғылындағы BRT жобасының орнына SkyTrain жүйесі іске қосылады