Қарт әкесін сабап, оны видеоға түсіріп таратқан «батыр бала» бес тәулікке қамалды

Солтүстік Қазақстан облысы Шал ақын ауданы Бірлік ауылында 22 жастағы жергілікті тұрғын 67 жастағы әкесін ұрып-соққан, деп хабарлайды Orda.kz «Жетінші арнаға» сілтеме жасап.

Сюжетте айтылғандай, мас  жігіт болған оқиғаның бәрін телефонға түсіріп, кейін бұл видео әлеуметтік желілерде тарап кеткен. Полицейлер шабуыл жасаған адамды да, жәбірленушіні де тез анықтаған. Белгілі болғандай, бұған дейін де жас жігіт бірнеше рет бұзақылық әрекеттері үшін ұсталған. Алайда бұл жолы полиция оны тұрмыстық зорлық-зомбылық бойынша жауапқа тарта алмады, себебі әкесі ұлына қарсы арыз жазудан үзілді-кесілді бас тартқан.

Оқиға туралы мәліметті СҚО ПД баспасөз хатшысы Әдемау Меңдібаева хабарлады.

«Шал ақын аудандық полиция бөлімінің қызметкерлері жанжалға қатысандарды анықтады. Әкесі ұлына ешқандай шағымы жоқ екенін айтты. Оның бетінде соққы іздері байқалмады, сондай-ақ егде жастағы ер адам сот-медициналық сараптамадан өтуден бас тартты», — деді баспасөз хатшысы. 

Жәбірленушінің ұстанымы мен медициналық сараптама қорытындысының болмауына байланысты құқық қорғау органдары ұсталған азаматқа тек балағат сөз айту және бұзақылық әрекеттерін ғана айып ретінде таға алды. Нәтижесінде сот құқық бұзушыға бес тәулік әкімшілік қамау жазасын тағайындады.

Сонымен қатар, жедел қызметкерлер жас жігітті ішкі істер органдарының профилактикалық есебіне қойды. Оған қатысты қорғау нұсқамасы да шығарылды. Егер ол бұл талаптарды бұзса, заң бойынша 10 тәулікке дейін қайта қамауға алу қарастырылған.

Бұған дейін Түркістан облысында осыған ұқсас жағдай тіркелген баласының тоқпағынан кейін көз жұмған ақсақалдың нақты өлім себебін анықтау үшін оның мәйіті қайта қазылып алынған еді.

Оқи отырыңыз:

• Түркістандағы өз әкесін тоқпақтап, өлімші халге жеткізген адам 5 жылға сотталды
• Сүйіктісінің әке-шешесін пышақтады: Ақтөбеде қанды оқиғаны көзімен көрген әйел сот алдына келді
• Ербаянның қазасына қатысты ДСМ мәлімет берді: Науқастың жағдайы өзгермеді