Шілде айынан бастап Қазақстанда әскерге шақыру цифрландырылады

Үкімет азаматтарды әскери қызметке шақыру қағидаларын жаңартты. Негізгі жаңалық – Қорғаныс министрлігінің цифрлық жүйесін (ҚР ҚМ ЦЖ) іске қосу. Бұл жүйе арқылы әскери есепті дербес жүргізу, шақырылушылардың деректерін тексеру және басқа мемлекеттік органдармен ақпарат алмасу жүзеге асады, деп хабарлайды Orda.kz.       

Енді шақыру комиссияларының шешімдері, медициналық тексеру нәтижелері және әскерге шақыру туралы бұйрықтар электронды цифрлық қолтаңбаны (ЭЦҚ) пайдалану арқылы электронды форматта рәсімделеді.

Сондай-ақ әскерге жіберілер алдында шақырылушылар жеке деректерін жинауға және өңдеуге келісім береді. Бұл мәліметтер цифрлық есепке алу картасына енгізіледі.

Бұдан бөлек, билік шақырылушыларды іріктеудің жаңа тәртібін белгіледі. Басымдық алдымен Мемлекеттік күзет қызметіне және ҰҚК Шекара қызметіне беріледі, одан кейін – Ұлттық ұланға.

Жаңа ережелер 4 шілдеден бастап күшіне енеді, ал кейбір нормалар 12 шілдеден бастап қолданысқа енгізіледі.

Бұған дейін Қазақстан Республикасының Қорғаныс министрлігі  әскери кафедра түлектерін екі жылдық қызметке шақыру тәртібін түсіндірген болатын.  Бұл туралы ведомствоның вице-министрі Асқар Мұстабеков мәлімде жасады.

Оның айтуынша, әскери кафедраны бітіріп, офицерлік шен алған түлектер кадрлық жұмылдыру резервін толықтыру үшін екі жыл мерзімге әскерге шақырылуы мүмкін.

Оқи отырыңыз:

• Әскери кафедрада оқығандар екі жылдық қызметке шақырыла ма?
• Қазақстанда әскерден жалтарғандарға жаңа шара әзірленіп жатыр
• Әскерде сарбаздарға психологиялық бейімделуге екі апта уақыт беріледі