Ату жазасы АҚШ-та өлім жазасын орындау тәсілі ретінде қайта енгізілді

АҚШ Әділет министрлігі федералдық өлім жазаларына жарияланған мораторийді алып тастап, үкімді орындау тәсілдерінің бірі ретінде ату жазасын қайта енгізді, деп хабарлайды Orda.kz.

Бұл шешім Дональд Трамптың бастамасына қатысты. Ол жаңа президенттік мерзімінің басында аса ауыр қылмыстар үшін жазаны қатаңдатуды ұсынған болатын. Оның пікірінше, мұндай қатаң шаралар «ең сорақы қылмыстардың алдын алу және жәбірленушілерге қатысты әділеттілікті қалпына келтіру үшін шешуші маңызға ие».

Сөз өлімге әкелетін пентобарбитал қолданылатын инъекцияны қайта енгізу және ату жазасын өлім жазасын орындау тәсілдерінің қатарына қосу туралы болып отыр. Билік сондай-ақ бұл жазаларды орындау инфрақұрылымын кеңейтіп, үкімдерді орындау рәсімдерін жеделдетуді жоспарлап отыр.

Қазірдің өзінде 44 сотталғанға ең жоғары жаза қолдану туралы өтініштер мақұлданған.

Алғашқы президенттік мерзімінде Трамп федералдық өлім жазаларына мораторийді алып тастап, сол кезде 13 адам өлім жазасына кесілген болатын. 2021 жылы бас прокурор Меррик Гарланд қайтадан шектеулер енгізіп, пентобарбиталды қолдануға тыйым салды, ал президент Джо Байден көптеген өлім жазасын өмір бойы бас бостандығынан айыру жазасына ауыстырған еді.

«Алдыңғы әкімшілік ең қауіпті қылмыскерлерге, соның ішінде террористерге, балалар мен полицейлерді өлтіргендерге қатысты ең жоғары жазаны қолданудан бас тартып, америкалықтарды қорғау жөніндегі міндетін орындамады», – деді бас прокурордың міндетін атқарушы Тодд Бланш. 

Бұған дейін Израиль парламенті террористер үшін өлім жазасын енгізу туралы заң қабылдаған еді. Бұл шешім ел ішінде де, шетелде де қатты сынға ұшырады.

Оқи отырыңыз:

• Түркістан облысында турнирге бара жатқан балалар жолда опат болды
• Алматының арықтары нөсер жаңбырды ағыза алмайды, әкімдік не дейді?
• Талдықорғанда асханада болған жанжал әйел өлімімен аяқталды