Түркістан облысында турнирге бара жатқан балалар жолда опат болды

25 сәуір 2026 07:15 Ләззат Сұңқар

Фото: Көрнекілік үшін

Түркістан облысындағы жантүршігерлік жол апатынан турнирге бара жатқан балалар қаза тапты, деп хабарлайды Orda.kz.

Түркістан облысында полиция үш жолаушы қаза тапқан өліммен аяқталған жол-көлік оқиғасын тергеп жатыр. Алдын ала мәлімет бойынша, көлікте кәмелетке толмаған спортшылар жаттықтырушымен бірге жарысқа бара жатқан. Рөлде жаттықтырушы отырған.

Апат 22 сәуір күні Түркістан облысындағы тасжолда болған. Қаза тапқандардың арасында Мақтаарал ауданынан шыққан мектеп оқушылары болған, олар волейбол турниріне бара жатқан. Оқушылардың сабақ уақытында неге жарысқа кеткені белгісіз.

Кейін Түркістан облысы полиция департаменті 22 сәуірде Арыс — Шардара автожолында Chevrolet Cobalt пен КамАЗ жүк көлігі соғылып, жол апаты болғанын растады. Апат салдарынан жеңіл көліктің үш жолаушысы оқиға орнында қаза тапқан. Chevrolet Cobalt жүргізушісі мен тағы бір жолаушы ауруханаға жеткізілген. Жүк көлігінің жүргізушісі аман қалған, ол уақытша ұстау изоляторына қамалды.

Түркістан облысы полиция департаменті бастығының орынбасары Бауыржан Зиятаевтың айтуынша, алдын ала деректерге сәйкес, кәмелетке толмаған спортшылар жаттықтырушымен бірге Түркістанға жарысқа бара жатқан.

«Кәмелетке толмағандарды тасымалдау туралы уәкілетті мемлекеттік органдарға, оның ішінде полицияға хабарланбаған», – деді ол.

Полиция қызметкерлерінің мәліметінше, қазіргі уақытта апаттың барлық мән-жайы анықталуда. Сонымен қатар балалардың өмірі мен денсаулығы қауіпсіздігін қамтамасыз ету жөніндегі міндеттерді тиісінше орындамау фактісі бойынша сотқа дейінгі тергеу басталды.

«Тергеу нәтижесі бойынша қолданыстағы заңнамаға сәйкес процессуалдық шешім қабылданады», – деп қосты Зиятаев.

Полиция азаматтарды жол қозғалысы ережелерін қатаң сақтауға және жолда барынша мұқият болуға шақырды.

Оқи отырыңыз:

Жаңалықтар

барлық жаңалықтар