Қазақстанда әуетакси мен дрондарды пайдалануға арналған заңнамалық негіз қалыптасты

Президент елімізде eVTOL (тік ұшып-қонып, электр қуатымен қозғалатын ұшу аппараттары) негізіндегі аэротаксиларды пайдалануға рұқсат беретін және ұшқышсыз авиацияны реттейтін заңға қол қойды, деп хабарлайды Orda.kz.        

Осылайша, Қазақстан АҚШ, Еуропалық одақ, Оңтүстік Корея және Қытаймен қатар мұндай көлік түрлеріне арналған дамыған құқықтық реттеу жүйесі бар елдердің қатарына қосылды.

Түзетулер әуе кеңістігін пайдалану туралы заңға енгізілді. Олар «озық әуе мобильдігі» ұғымын заң жүзінде бекітіп, eVTOL аппараттарын пайдалану қағидаларын және олардың ұшып-қонатын арнайы алаңдары – вертипорттардың құқықтық мәртебесін айқындайды.

Сонымен қатар, осындай көлік құралдарының операторларын сертификаттау тәртібі белгіленіп, дрондардың ұшуын цифрлық басқару жүйесі енгізіледі. Бұл жүйе ұшу бағыттарын бақылап, әуе кеңістігіндегі ұшқышсыз аппараттардың қозғалысын үйлестіретін болады.

Бұдан бөлек, киберқауіпсіздік талаптары күшейтіліп, ұшқышсыз ұшу аппараттарын тіркеу, пайдалану және сертификаттау тәртібі де нақты реттелді.

Біз жақында ҚР ІІМ-де дрон операторларын оқыту зертханасы ашылғанын хабарлағанбыз. Ішкі істер органдарын жаңғырту мен цифрландыру үдерісі аясында полиция қызметкерлері ұшқышсыз авиациялық технологияларды белсенді түрде игеріп жатыр.        

ІІМ-нің жедел-криминалистикалық департаменті жанынан арнайы оқу-жаттығу зертханасы ашылып, онда тәртіп сақшылары дрондарды басқару бойынша кешенді дайындық жүріп жатыр.

Оқи отырыңыз:

• Әуетакси Алматы әуежайынан Медеуге дейін 10–12 минутта жетеді
• Әуетаксидің ұшу құны белгілі болды
• ІІМ дрон операторларын оқытып, әуеден әрекет етуге дайындайды