Әуетаксидің ұшу құны белгілі болды

Бір ұшу құны — 7 000 теңге. Үкіметте әуе таксиінің бағасы туралы айтылды. Премьер-министрдің орынбасары Қанат Бозымбаев ұшу құны 1 шақырымға 1 доллар болуы мүмкін екенін мәлімдеді, деп хабарлайды Orda.kz.       

Оның айтуынша, қазір әуе таксиін сынақтан өткізуге дайындық жүріп жатыр. 2026 жылы жолаушыларсыз ұшу сынақтары жүргізіледі. Болашақ бағыттар тау кластерін, Алматы әуежайын, қаланың теміржол вокзалдарын, Қонаев қаласын және Қапшағай су қоймасы байланыстырады деп жоспарлануда.

«Мұның бәрін әуеден қарап шығу керек, қандай биіктікте ұшатынын тексеру қажет. Төрт маусым толық өтуі тиіс. Өйткені бұл — қауіпсіздік мәселесі. Аэромагниттік өрістер бар, жоғары вольтты желілер бар», – деді Бозымбаев. 

19 мамырда Алматы маңындағы Alatau City аумағында Қазақстандағы алғашқы eVTOL базасындағы әуе таксиінің демонстрациялық ұшуы көрсетілді.        

Жобаны жүзеге асырып жатқан — Alatau Advance Air Group Ltd. компаниясы. Бұл Орталық Азиядағы Urban Air Mobility (UAM), яғни қалалық әуе мобильдігін дамыту бағытындағы алғашқы ірі жобалардың бірі болды.

eVTOL — тік ұшып-қонатын, толықтай электр қуатымен жұмыс істейтін жаңа буын әуе көлігі. Қарапайым тілмен айтқанда, бұл — тікұшақ пен дронның арасындағы гибридке ұқсайтын, бірақ жанармайсыз ұшатын аппарат.

Компания өкілдерінің айтуынша, болашақта әуе көлігінің үш түрлі моделі шығарылмақ. Алғашқысы — жүк тасымалына арналған карго нұсқасы. Екінші түрі адамдарды тасымалдауға және төтенше жағдайларда қолдануға бейімделген. Мұндай аппараттар жоғалған адамдарды іздеуде, өрт кезінде бақылау жүргізуде және құтқару операцияларында тиімді болуы мүмкін.

Еске салсақ, болашақта Алматы әуежайынан Медеуге дейінгі аралықты 10–12 минутта еңсере алатын  аэротаксидің коммерциялық ұшулары 2028 жылға қарай іске қосу жоспарланып отыр.       

Оған дейін аппараттарды сертификаттау, инфрақұрылым салу, дрондар мен eVTOL аппараттарын басқаруға арналған бағдарламалық қамтамасыз ету жүйелерін әзірлеу және басқа да дайындық жұмыстары жүргізіліп жатыр.

Оқи отырыңыз:

• • 80 жылда алғаш рет әуе көлігінің жаңа түрі шығады
  • Әуетакси Алматы әуежайынан Медеуге дейін 10–12 минутта жетеді
  • Алматыдан Алатауға метромен емес, LRT-мен қатынаймыз