Астанада өз бетінше автобус жуып жүрген жігіттің әрекеті мемге айналды

Жігіттің бір әрекеті мыңдаған талқылауға себеп болды. Махмудтың оқиғасы әлеуметтік желілерде кең таралып, көпшілік қарапайым әдетті үлгіге айналдыруға болатынын сөз етіп жатыр жатыр, деп хабарлайды Orda.kz.       

Әлеуметтік желі дәуірінде қолданушыларды таңғалдыру қиын екені рас. Күн сайын ондаған вирустық бейне пайда болады, бірақ олардың бәрі бірдей адамды ойландырмайды.

Осындай видеолардың бірі Астанадағы автобустардың бірінде түсірілген. Қолына су толы шелек көтерген жас жігіт ешкімнің өтінішінсіз қоғамдық көліктің еденін мұқият жуып жүр. Бейнежазба әлеуметтік желілерде тез тарап, жүздеген пікір мен талқылауға себеп болды. 

Бейненің басты кейіпкері – елорданың 27 жастағы тұрғыны Махмуд. Оның айтуынша, бұл ерекше ой кенеттен пайда болған, бірақ бірден іске асыруға асықпаған.

«Кеңседе отырдым, дәптерге бірдеңе жазып отырғанмын, кенет осындай ой келді. Бірақ оны бірден қолға алмадым. Бір апта, бәлкім екі апта ойландым. Сосын бәрібір байқап көріп, қандай реакция болатынын білгім келді», – дейді ол.

Нәтижесінде бейнежазба көп қаралым жинап, оның әрекеті қолданушылар тарапынан оң қабылданды. Махмуд үшін ең бастысы – адамдардың реакциясы болған.

«Көріп отырмын – адамдарға ұнайды. Көреді, күледі. Мүмкін біреу үлгі алар. Тіпті тазаламаса да, ең болмаса қоқыс тастамаса екен. Қай жерде болса да – көшеде, қоғамдық көлікте, қоғамдық орындарда немесе үйде, кіреберісте, аулада», – дейді 

Оның айтуынша, ол үшін басты мақсат – өз әрекетіне назар аударту емес, әр адамға байланысты қарапайым дүниелерді еске салу. Оның пікірінше, қаланың тазалығы коммуналдық қызметтің ғана емес, тұрғындардың да жеке жауапкершілігінен басталады.

Махмудты ең қатты таңғалдырғаны – қаралым мен пікір саны емес, бейненің мүлде бейтаныс адамдарға сыйлаған эмоциясы.

«Шынымды айтсам, маған сол энергия ұнады. Бір жақсы алмасу болды. Маған ұнады», – дейді ол. 

Ол бұл бастаманы тұрақты акцияға айналдыруды жоспарлап отырған жоқ. Қазір оның басқа идеялары бар, бірақ болашақта мұндай тәжірибені қайталауы мүмкін екенін жоққа шығармады.

«Шынымды айтсам, тағы барып автобус жуу керек пе, жоқ па – білмеймін. Қазір басқа жоспарлар бар», – дейді ол. 

Сонымен қатар, Махмуд ешкімді арнайы үгіттеудің қажеті жоқ деп санайды. Оның ойынша, қоршаған ортаға құрметпен қарау – әр адамның ішкі таңдауы болуы тиіс.

«Адамдарды тартуға болады, әрине. Бірақ меніңше, әр адам өзі түсінуі керек: бұл – қоршаған орта, табиғат. Әлем бізге бәрін берді – ауа, тазалық, денсаулық. Біз тек соны сақтап, құрметпен қарауымыз керек», – дейді ол. 

Бұл жай ғана шелек алып, автобус жуу емес. Бұл – бір ерекше әрекеттің өзі адамдарды күнделікті дүниеге басқа көзқараспен қарауға жетелей алатынын еске салатын мысал деп ойлаймыз.

Оқи отырыңыз:

• Жаңа талап: Жүргізуші куәлігін жарамсыз етуге қандай негіз бар?
• Алакөлде бір адам қаза тауып, зейнеткер әйел екі аяғынан бірдей айырылды
• Венгрия президенті өзін қызметтен кетіретін түзетуге қол қойды