Алакөлде бір адам қаза тауып, зейнеткер әйел екі аяғынан бірдей айырылды

Соңғы үш күнде Алакөл көлі аумағында гидроциклдер мен катерлерге қатысты екі қайғылы жағдай болды. Бір оқиғада адам қаза тапса, екіншісінде зейнеткер әйел екі аяғынан айырылды, деп хабарлайды Orda.kz тілшісі.

16 шілде кешкісін 69 жастағы Алматы тұрғынын жүріп келе жатқан катер қағып кеткен. Дәрігерлердің мәліметінше, әйел шұғыл түрде Алакөл аудандық орталық ауруханасына жеткізілген.

Оған ауыр аралас политравма диагнозы қойылды, сол аяғы жұлынып кеткен, ал оң аяғы қатты зақымданып, сүйектері үгітілген. Науқас шок жағдайында көп қан жоғалтқан. Өмірін сақтап қалу үшін дәрігерлер екі аяғын да ампутациялауға мәжбүр болған.

18 шілдедегі жағдай бойынша, ол жансақтау бөлімінде жатыр. Өте ауыр халде болғанына қарамастан, дәрігерлер оң динамика бар екенін айтады.

Жетісу облысы полиция департаментінің мәліметінше, оқиға Алакөл ауданындағы Көктұма ауылы маңында болған. Аталған факті бойынша қылмыстық іс қозғалып, оқиғаның барлық мән-жайы анықталуда.

Келесі күні, 17 шілдеде көл акваториясында екі гидроцикл соқтығысқан. Жетісу облысының ТЖД дерегіне сәйкес, бір гидроцикл екіншісін соққан. Апат салдарынан бір адам қаза тауып, тағы бір адам жарақат алған.

Бұл дерек бойынша Алакөл аудандық полиция бөлімі сотқа дейінгі тергеу жүргізіп жатыр.

Екінші оқиғадан кейін құтқарушылар навигациялық шамдармен жабдықталмаған шағын кемелермен түнгі уақытта суға шығуға тыйым салынатынын еске салды.

Шомылу маусымы басталғалы бері ведомство қызметкерлері Алакөлде күн сайын рейд жүргізіп келеді, ал 1 шілдеден бастап шағын көлемді кемелерді пайдалану бойынша мемлекеттік бақылау күшейтілген. Су қауіпсіздігі ережелерін бұзғаны үшін 108 әкімшілік хаттама толтырылған.

Құтқарушылар катер мен гидроцикл иелерін қауіпсіздік талаптарын сақтауға, тыйым салынған уақытта суға шықпауға, құтқару жилеттерін пайдалануға, қажетті құжаттарды өзімен бірге алып жүруге және кемелердің рұқсат етілген жолаушы санынан асырмауға шақырды.

Айта кетейік, бір жыл бұрын да Алакөлде катер жүргізген ер адам 63 жастағы демалушы әйелді қағып, ол алған жарақаттарынан көз жұмған. Қайғылы оқиға жағалаудан 200–250 метр қашықтықта болған, әйел суға шомылып жүрген кезде катер оны басып кеткен.

Оқи отырыңыз:

• Нұрай Серікбайдың қазасына қатысты сот 21 шілдеде басталады
• ӘЧ-2026: Мбаппе ең үздік шабуылшы атанып, Мессиден асып түсті
• Қатты ыстықтан Қазақстанның үш облысындағы жол бұзылды