Астанада Ақордаға қарама-қарсы орналасқан Триатлон паркінде өрт шықты

Астанадағы Триатлон паркі аумағындағы Арқар көпірі астында орналасқан алаңдардың бірі өртенді. Бұл орын елорда тұрғындарының сүйікті демалыс аймақтарының бірі саналып келген, деп хабарлайды Orda.kz тілшісі.      

Өрт парк аумағында болған. Тілсіз жау нысанның бір алаңын шарпыған. Куәгерлердің айтуынша, төтенше қызметтер жеткенге дейін олар жалынды өз күштерімен сөндіруге тырысқан.

Куәгерлердің сөзінше, өрт алаңдағы құрылым элементтері арқылы тез таралған. Өрт сәтінің видеолары әлеуметтік желілерде жарияланып, қолданушылар арасында қызу талқылау тудырды. Қазіргі уақытта оқиғаның нақты себебі ресми түрде жарияланған жоқ. Мамандар өрттің шығу себептерін анықтап жатыр. Абырой болғанда, зардап шеккендер жоқ.

Полиция өрт қоюға күдікті ретінде кәмелетке толмаған төрт баланы анықтады. Олар саябақта үлкендердің қарауынсыз жүріп, көгалға от қойған.

Тілсіз жау дер кезінде ауыздықталды. Жасөспірімдер полиция бөліміне жеткізілді. Қазіргі таңда бөтеннің мүлкін қасақана жою дерегі бойынша қылмыстық іс қозғалды. Сонымен қатар, бала тәрбиесіне салғырт қарағаны үшін олардың ата-аналары да заң алдында жауап береді.

Айта кетейік, бұл аумақ жақында ғана жаңартылған еді. Мұнда тренажерлар орнатылып, воркаут аймағы, әмбебап спорт алаңы және йогаға арналған арнайы орын жасақталған.

Бұған дейін де елімізде өрт оқиғалары тіркелген болатын. Мәселен, Семей орманы мемлекеттік орман табиғи резерваты аумағында бір тәуліктің ішінде 14 орман өрті болғаны хабарланған.

Оқи отырыңыз:

• Қайрат Сатыбалдының меншігі болған Kaisar Plaza бизнес-орталығы миллиондарға арзандаса да ешкімге керек болмай тұр
• ДСҰ және World Population Review дерегі бойынша Қазақстан Орталық Азиядағы ең көп ішетін елге айналған
• АҚШ-та Қазақстан азаматы терроризм күдігімен ұсталды