Астанада 20 жастағы жігіт тісін емдеймін деп барып, өмірінен айырылды

Астана қаласында 20 жастағы Есболған Мұрат Жеңісханұлының туыстары оның Tem.Dent стоматологиясына барғаннан кейін қайтыс болғанын мәлімдеді. Олардың айтуынша, жас жігіт дәрі егілгеннен кейін көз жұмған, деп хабарлайды Orda.kz.      

Жақындарының сөзінше, 2005 жылы туған жігіт қабылдауға еш шағымсыз, тек тісін емдету үшін келген. Инъекция алдында оған аллергиялық сынама жасалмаған. Алғашқы екпеден кейін жігіттің денесі құрыса бастаған. Туыстарының айтуынша, соған қарамастан оған қайтадан дәрі егілген.

Кейін жігіт есінен танып қалған. Оқиға орнына жедел жәрдем шақырылғанымен, отбасының айтуынша, оны аман алып қалу мүмкін болмаған.

«Астана қаласы, Кенесары 65 мекенжайындағы «Tem Dent» стоматологиясында Есболған Мұрат Жеңісханұлы жан тапсырды. Айтуларынша, стоматолог аллергияға сынама жасамай дәрі еккен. Дәріден кейін Мұраттың денесі құрысып, дірілдеп, жағдайы қиындаған. Соған қарамастан екінші рет тағы да екпе салынған. Сол сәтте Мұрат жан тапсырған. Ең қорқыныштысы — екпені аллергияға сынама жасамай, тәжірибеден өтіп жүрген адам салғаны айтылып жатыр. Стоматолог толық бақылау жасамаған. Жақындары әділдік іздеп жүр. Бірақ полиция бұл істі дұрыс қарамай отыр» деп жазды автор. 

Марқұмның туыстары екпені дәрігер емес, тәжірибеден өтіп жүрген студент жасағанын, ал жанында медбике болғанын айтады. Сонымен қатар, олардың сөзінше, болған жағдай туралы ата-анасына бірнеше сағаттан кейін ғана хабарлаған.

Қайтыс болған жігіттің отбасы оқиғаның мән-жайын мұқият тергеуді талап етіп, бұл жағдайға назар аударуға шақырып, жантласып жатыр.

Бұл ақпаратты полиция да растады.

«20 жастағы елорда тұрғынының қалалық стоматологиялық орталықтардың бірінде қайтыс болу фактісі бойынша Астана қаласының полиция департаменті сотқа дейінгі тергеп-тексеру жүргізіп жатыр. Қазіргі уақытта бірқатар тергеу шаралары тағайындалды, олардың қорытындысы бойынша процессуалдық шешім қабылданады» деп жазылған ведомство хабарламасында. 

Елімізде соңғы кезде стоматология төңірегндегі дау-дамай өршіп тұр. Жақында ғана мемлекеттік және жекеменшік медициналық ұйымдардың міндетті әлеуметтік медициналық сақтандыру жүйесінде қаражатты заңсыз алғаны туралы жаздық. МӘМС арқылы миллиондаған теңге залал келтіріліп,  Түркістан облысында стоматолог бір уақытта 10 науқастың «тісін емдеген».

Тергеу нәтижесінде келтірілген залал толық өтелуіне байланысты іс тоқтатылды. Сонымен қатар, 203 млн теңге көлемінде стоматологиялық қызмет жалған көрсетілген. 

Оқи отырыңыз:

• Бақытжан Базарбек: Олигархтарға «сот төрелігі» ерекше
• МӘМС арқылы миллиондаған теңге залал: Түркістан облысында стоматолог бір уақытта 10 науқастың «тісін емдеген»
• Медициналық сақтандыруға қатысты даудан кейін қорды Гүлмира Сәбденбек басқаратын болды