МӘМС арқылы миллиондаған теңге залал: Түркістан облысында стоматолог бір уақытта 10 науқастың «тісін емдеген»

Түркістан облысындағы мемлекеттік және жекеменшік медициналық ұйымдардың міндетті әлеуметтік медициналық сақтандыру жүйесінде қаражатты заңсыз алғаны белгілі болды, деп хабарлайды Orda.kz.

Бас прокуратура лицензиясыз консультациялық-диагностикалық қызметтерді сапасыз көрсеткендерді анықтады. 

Мысалы, облыстағы жекеменшік клиникалардың бірінде рұқсат құжаттарынсыз 20-ға жуық маман қызмет көрсеткен. Олардың атынан 28 мыңнан астам консультация көрсетіліп, 91 млн теңге көлемінде қаражат алынған.

Тергеу нәтижесінде келтірілген залал толық өтелуіне байланысты іс тоқтатылды.

Сонымен қатар, 203 млн теңге көлемінде стоматологиялық қызмет жалған көрсетілген. 

Екі аффилирленген клиника өздеріне үш дәрігерді рәсімдеп, электрондық төлем жүйесіне жүкті әйелдер мен балаларға көрсетілгендей етіп 40 мың жалған стоматологиялық қызмет енгізген.

Тексеру барысында бір стоматологтың бір күнде әртүрлі клиникаларда бір мезгілде ондаған науқасқа «қызмет көрсеткені» белгілі болды.

Тергеп-тексеру жүргізіліп, материалдар сотқа жолданды.

Оқи отырыңыз:

• Алматыда жеке стоматологиялық клиникалардың директоры үйқамаққа алынды
• Руслан Закиев: денсаулық сақтау министрлігі диабетпен ауыратындарды «өлтіріп жатыр» ма?