Медициналық сақтандыруға қатысты даудан кейін қорды Гүлмира Сәбденбек басқаратын болды

2026 жылғы 23 қаңтарда әлеуметтік медициналық сақтандыру қорында (ӘМСҚ) басшылық ауысты. ӘМСҚ басқарма төрағасының жаңа төрайымы Гүлмира Сәбденбекті ұжымға Қазақстан Республикасы қаржы министрлігі аппаратының басшысы Ернар Ержанов таныстырды, деп хабарлайды Orda.kz  қаржы министрлігінің баспасөз қызметіне сілтеп.

Гүлмира Сәбденбектің бейінді медициналық білімі бар, қоғамдық денсаулық сақтау магистрі  дәрежесіне ие. Ол денсаулық сақтау саласында басқарушылық тәжірибе жинақтаған: әр жылдары Ұлттық медициналық холдингтің стратегиялық даму департаментін басқарған, «Ұлттық ғылыми кардиохирургия орталығы» АҚ басқарма төрағасының орынбасары қызметін атқарған.

ӘМСҚ-на тағайындалғанға дейін ол ҚР Президенті Әкімшілігінің әлеуметтік-экономикалық саясат бөлімі меңгерушісінің орынбасары болып жұмыс істеп, әлеуметтік саясат пен орнықты даму, сондай-ақ мемлекеттік аудит пен қаржылық бақылау мәселелерін қадағалаған.

Сондай-ақ қор ұжымына басқарма төрағасының бірінші орынбасары ретінде Айдар Мекебеков таныстырылды. Оның ҚР Қаржы министрлігі жүйесінде көпжылдық жұмыс тәжірибесі бар. Еңбек жолын салық инспекторы болып бастаған, кейін мемлекеттік кірістер мен қаржылық бақылау органдары бөлімшелерін басқарған, Қаржы министрлігінің Қаржылық мониторинг комитеті төрағасының орынбасары қызметін атқарған. Соңғы уақытқа дейін Мекебеков «Қазақмыс корпорациясы» ЖШС-де ұрлыққа қарсы іс-қимыл департаментінің директоры болған.

Қаржы министрлігі әлеуметтік медициналық сақтандыру қорының қызметі халықтың нақты қажеттіліктерін ескере отырып, қаражатты мақсатты әрі ашық бөлуге, сондай-ақ қолжетімді және сапалы медициналық көмекті қамтамасыз етуге бағытталатынын атап өтті.

Жаңа басшылықтың тағайындалуы ӘМСҚ-да жүргізіліп жатқан ауқымды тексерулер аясында жүзеге асты. Бұған дейін аудит жүйелі бұзушылықтарды анықтаған: есептерде бір дәрігердің тәулігіне мыңдаған «қабылдау» жүргізгені,  қайтыс болған пациенттерге медициналық қызмет көрсетілгені, скринингтердің пациенттердің жынысына сәйкес келмегені, тағы да басқа көптеген өрескел бұзушылықтар тіркелген. Сонымен қатар балаларға дәрі-дәрмектерді жаппай негізсіз беру және бір адамға бір күнде мыңдаған препарат есептен шығарылған жағдайлар да анықталған.

Оқи отырыңыз:

• Оспадарсыз әлеуметтік сақтандыру: қайтыс болғандарды қабылдауға жазып, ер адамдарды әйелдерге арналған скринингтен өткізген
• Биылдан бастап МӘМС арқылы кімдер тегін емделе алады
• 2026 жылғы МӘМС-тің жаңа ережелері: Медициналық көмекті бюджеттен алуға бола ма?
• Еліміздегі онкологиялық скринингтер МӘМС-сіз де қолжетімді болады