Астана маңындағы ауылдағы көкпар жаттығуы оқушы өлімімен аяқталды

Ақмола облысы Целиноград ауданына қарасты Рахымжан Қошқарбаев ауылында болған қайғылы оқиғадан кейін полиция қылмыстық іс қозғады, деп хабарлайды Orda.kz.

Оқиға 26 мамыр күні болған.

«Ұлттық ойын – көкпар жаттығуы кезінде 2012 жылы туған кәмелетке толмаған бала аттан құлап, көз жұмды», деп мәлімдеді облыстық полиция департаменті баспасөз қызметі редакцияның сауалына жауап ретінде. 

Алдын ала мәлімет бойынша, бала ауруханаға бара жатқан жолда қайтыс болған.

Целиноград ауданы әкімдігінің мәліметінше, бұл спорттық іс-шара олармен келісілмеген. Ал облыстық білім басқармасы ресми түсініктемесінде «жаттығу» деген сөзді қолданбаған.

«Алдын ала ақпаратқа сәйкес, оқиға сабақтан тыс уақытта ашық жерде балалар атқа мінген кезде болған»,  деп түсіндірді әкімдік өкілдері. 

Облыстық дене шынықтыру және спорт басқармасының хабарлауынша, бұл көкпар секциясы оларға қарасты емес.

«Онда біздің филиал жоқ, сондықтан жаттығу немесе жарыс өткізілген жоқ. Егер секция болса, ол жергілікті, ауылдық деңгейде ұйымдастырылған»,  деп нақтылады ведомствоның баспасөз қызметі. 

Ақмола облысы полиция департаменті қылмыстық іс қозғалғанын хабарлап, тергеу аясында жаттығу ұйымдастырғандар мен балалардың қауіпсіздігіне жауапты тұлғалардың әрекетіне құқықтық баға берілетінін мәлімдеді.

Оқи отырыңыз:

• Қырғызстанда өтетін Көшпенділер ойындарына қазақтың көкпары қосылды
• Ертіс көпірінде жүргізуші бір топ баланы қағып, алтауы дәрігер көмегіне жүгінді
• Ақтөбе облысында бірінші сынып оқушысы мектепте бензин ішіп қойған