Ақтөбе облысында бірінші сынып оқушысы мектепте бензин ішіп қойған

Ақтөбе облысының Қобда ауданындағы мектептердің бірінде бірінші сынып оқушысы үлкен үзіліс кезінде жертөлеге түсіп, бөтелкедегі бензинді ішіп қойған. 15 мамыр күні болған бұл оқиға туралы тек қазір белгілі болды, деп хабарлайды Orda.kz.       

Баланың ата-анасы әлеуметтік желіде мәлімдеме жасап, жағдайдың мән-жайын айтып берді. Олардың сөзінше, оқиға болғаннан кейін бала сыныпқа қайта оралған. Мұғалім бензиннің иісін сезіп, оқушыдан сұрағанда, ол болған жағдайды мойындаған.

Бала өзін қалыпты сезінгендіктен, сабақ тоқтатылмаған, кейін ол үйіне жіберілген. Мұғалім бұл жағдай туралы ата-анасына хабарлаған.

Алайда үйге барған соң баланың жағдайы нашарлап, бірнеше рет құсқан. Ол шұғыл түрде жергілікті ауруханаға жеткізіліп, асқазаны жуылған. Кейін Ақтөбе қаласындағы ауруханаға жіберілген.

Денсаулық сақтау басқармасының мәліметінше, медициналық көмек уақтылы көрсетілген. Облыстық балалар ауруханасында ем алып, бақылаудан кейін баланың жағдайы тұрақталған, өміріне қауіп жоқ. Қазір ол қанағаттанарлық жағдайда үйіне шығарылған.

Оқиғадан кейін аудандық білім бөлімі қызметтік тексеріс жүргізді. Мектеп директоры, шаруашылық жөніндегі орынбасары және педагог-ассистент тәртіптік жауапкершілікке тартылған. Алайда ата-аналар бұл шараларға қанағаттанбағандықтан, білім басқармасында қосымша комиссия құрылған. Сондай-ақ баланың туыстары оқиғадан кейін отбасыдан ешкім кешірім сұрамағанын мәлімдеді.

Оқи отырыңыз:

• Қандай мамандар сұраныста: Биылғы жылға арналған гранттар бөлінісі
• Биыл 3,9 миллион түлек мектеп бітірді, 13 175 оқушы «Алтын белгіге» үміткер