Армения ресми түрде ҰҚШҰ елдерінен көмек сұрады

Армения Әзірбайжанмен шекарадағы қақтығысқа байланысты Ресей Федерациясына, ҰҚШҰ мен БҰҰ Қауіпсіздік Кеңесіне ресми түрде шағымдануға шешім қабылдады.

Бұл туралы бір сағат бұрын үкіметтің Facebook парақшасында хабарлама жарияланды.

Армения премьер-министрі Никол Пашинянның төрағалығымен Қауіпсіздік кеңесі отырысы өтті, оған Қауіпсіздік кеңесінің мүшелерінен бөлек, президент Ваган Хачатурян мен Ұлттық жиналыс төрағасы Ален Симонян қатысты.

«Арменияның егеменді аумағына жасалған агрессияға байланысты Достық, ынтымақтастық және өзара көмек туралы шарттың ережелерін орындау мақсатында Ресей Федерациясына, Ұжымдық қауіпсіздік шарты ұйымына және БҰҰ Қауіпсіздік кеңесіне ресми түрде жүгіну туралы шешім қабылданды» делінген хабарламада.

Армения қорғаныс министрлігінің хабарлауынша, 13 қыркүйекте таңғы сағат 00:05-те Әзірбайжан Қарулы Күштерінің бөлімшелері Сотк, Варденис, Горис, Капан, Артаниш, Ишханасар бағытында артиллерия мен ірі калибрлі зеңбіректерден армян позицияларын қарқынды атқылай бастады.
Ал Әзірбайжан қорғаныс министрлігі Ереванды бірнеше бағытта ауқымды диверсия жасады деп айыптады.