Алматыда сел қаупіне байланысты тұрғындарды алдын ала эвакуациялау басталды

Алматы қаласының Наурызбай ауданында Ақсай өзені аңғары бойында тұратын тұрғындарды алдын алу мақсатында эвакуациялау жүргізілуде. Мұндай шешім сел қаупіне байланысты қабылданды, деп хабарлайды  Orda.kz Төтенше жағдайлар министрлігіне сілтеме жасап.

Тұрғындарды уақытша Наурызбай ауданындағы мектеп базасында ұйымдастырылған қабылдау пункттеріне орналастырып жатыр.

ТЖМ мәліметінше, оқиға орнында жедел штаб жұмыс істеп, азаматтық қорғау қызметтері жұмылдырылған. Сондай-ақ 8 (727) 279-22-32 нөмірі бойынша «жедел желі» іске қосылған. Соңғы мәлімет бойынша, төрт өтініш келіп түскен.

Ведомство барлық шаралар жоспарлы түрде өтіп жатқанын және жағдай толық бақылауда екенін атап өтті.

Бұған дейін Наурызбай ауданында сел қаупіне байланысты жергілікті хабарландыру жүйесі қосылған болатын. Тұрғындардың ұялы телефондарына шұғыл хабарламалар жіберіліп, дауыс күшейткіштер арқылы да ескерту жасалды.

ТЖМ бұл ескертулердің алдын алу сипатында екенін және таулы аймақтарда жауын-шашынның күшеюі болжануына байланысты берілгенін түсіндірді. Құтқару бөлімшелері, «Қазселденқорғау» мамандары және ТЖД күшейтілген режимге көшірілді.

Сонымен қатар Алматы тұрғындары мен қала қонақтарына ауа райы тұрақталғанға дейін тауға барудан және демалыстан уақытша бас тарту ұсынылды.

Оқи отырыңыз:

• Су басқан Алматы әуежайы жауапкершілікке тартылды
• Қазақстанда әуетакси мен дрондарды пайдалануға арналған заңнамалық негіз қалыптасты
• Үкімет ең төменгі жалақы мөлшерін арттыру мәселесін қарастырады