Алматыда сайлау күні қоғамдық көлікте жүру тегін: Ақы төлеген жолаушыларға ақшасы қайтарылады

Алматы қаласы Жол қозғалысын ұйымдастыру және жолаушылар көлігі басқармасы Құрылтай сайлауы өтетін күні қоғамдық көлікте жолақы төлеген жолаушыларға ақшасы қайтарылатынын мәлімдеді, деп хабарлайды Orda.kz.

Ведомствоның хабарлауынша, 23 тамызда Алматыдағы қоғамдық көлікте жүру тегін. Бұл жеңілдік қаладағы барлық қоғамдық көлік бағыттарына – автобустарға, троллейбустарға және метроға күні бойы қолданылады.

«23 тамызда жолақысы есептен шығарылған жолаушыларға қаражат автоматты түрде қайтарылады. Бұл үшін қосымша өтініш берудің қажеті жоқ»,  деп хабарлады басқарма редакция сауалына берген жауабында. 

Ведомство өкілдері тегін жол жүрудің сайлау күні Алматы тұрғындары мен қала қонақтарының қала ішінде қолайлы әрі еркін қатынауын қамтамасыз ету мақсатында енгізілгенін атап өтті.

Қала тұрғындары мен қонақтарына сапарларын алдын ала жоспарлап, қоғамдық көлікті пайдалануға кеңес берілді.

Бұған дейін 23 тамызда Алматы мен Астана тұрғындары қоғамдық көлікте тегін жүре алатыны хабарланған еді. Мұндай шешім Құрылтай депутаттарының сайлауы өтетін күнге байланысты қабылданған.

23 тамыз күні таңертең Қазақстанда бір палаталы парламентке, яғни Құрылтай депутаттарының сайлауы басталды.

Orda.kz сайлау барысын  тікелей мәтіндік трансляция арқылы жариялап жатыр.

Оқи отырыңыз:

• «Құрылтай сайлауы LIVE»: Жаңа бірпалаталы Парламентке дауыс беру
• ҚР ІІМ: Жағдай тұрақты, сайлау учаскелері тәулік бойы күзетіледі