ҚР ІІМ: Жағдай тұрақты, сайлау учаскелері тәулік бойы күзетіледі

ҚР Ішкі істер министрлігінің ресми өкілі Шыңғыс Әлекешевтің айтуынша, полицияның басты міндеті – дауыс беру басталған сәттен бастап сайлау аяқталғанға дейін қоғамдық тәртіп пен азаматтардың қауіпсіздігін қамтамасыз ету, деп хабарлайды Orda.kz.

Әлекешевтің айтуынша, барлық дайындық жұмыстары алдын ала жүргізілген. Сайлау учаскелері қауіпсіздігі тексеріліп, олар тәулік бойы күзетке алынған.

«ІІМ-де жедел штаб жұмыс істеп тұр. Еліміздің барлық өңірінен ақпарат онлайн режимде үздіксіз келіп түсуде. Қазіргі уақытта елдегі жағдай тұрақты. Қоғамдық тәртіпті өрескел бұзу фактілері тіркелген жоқ», – деді спикер Орталық коммуникациялар қызметіндегі онлайн марафон аясында өткен брифингте. 

ҚР ІІМ ресми өкілі полицияның сайлау процесіне араласпайтынын атап өтті. Полиция қызметкерлері дауыс беру залына тек сайлау комиссиясы төрағасы шақырған жағдайда ғана кіре алады.

23 тамыз күні таңертең Қазақстанда бір палаталы парламент – Құрылтай депутаттарының сайлауы басталды.

Orda.kz сайлау барысын  тікелей мәтіндік трансляция арқылы жариялап жатыр.

Еске салсақ, мемлекет басшысы Қасым-Жомарт Тоқаев Құрылтай сайлауы қарсаңында Қазақстан халқына үндеу жолдап, «Тағдыршешті сәтте әр адамның дауысы маңызды» екенін атап өткен болатын. 

Президент елімізде жаңа бірпалаталы Құрылтайдың алғашқы сайлауы өтетінін еске салып,  бұл – ұлт тағдырына тікелей әсер ететін тарихи оқиға екенін тоқталды. 

Оқи отырыңыз:

• «Құрылтай сайлауы LIVE»: Жаңа бірпалаталы Парламентке дауыс беру
• Тоқаев: Тағдыршешті сәтте әр адамның дауысы маңызды