Алматыда орталық қалалық ауруханаға 2,5 млн теңге айыппұл салынды

Алматы орталық ауруханасында медициналық жабдықтарды пайдаланудың өрескел бұзушылықтары анықталды, деп хабарлайды Orda.kz  сауда министрлігінің баспасөз қызметіне сілтеп.

Ведомствоның баспасөз қызметінің хабарлауынша, Алматы қаласында Техникалық реттеу және метрология комитеті департаменті жүргізген жоспардан тыс тексеру қорытындысы бойынша Орталық қалалық клиникалық ауруханада өрескел бұзушылықтары анықталған.

«Тексеру барысында 2026 жылғы 11 ақпанға дейін медициналық мекемеде 106 науқас мониторингі модулі міндетті рәсімдерден өтпей пайдаланылғаны белгілі болды.
Жабдық түрі бекітілмей немесе метрологиялық аттестаттаудан өтпей қолданылған, мемлекеттік тізілімде тіркелмеген және міндетті тексеруден өтпеген. Соған қарамастан, құрылғылар медициналық көмек көрсету барысында пайдаланылған»,  деп хабарлады ведомство. 

Әңгіме науқастардың өмірлік маңызды көрсеткіштерін бақылауға арналған модульдер туралы болып отыр, атап айтқанда жүректің соғу жиілігі, артериялық қысым, қандағы оттегімен қанығу деңгейі (SpO₂), электрокардиограмма (ЭКГ) және дене температурасына қатысты құрылғылар.

Министрлік мәліметінше, өлшеу дәлдігі расталмаған мұндай жабдықты қолдану клиникалық шешім қабылдауға тікелей әсер етіп, пациенттерге қауіп төндіреді.

 «Қадағалау шараларының нәтижесінде анықталған бұзушылықтарды жою туралы міндетті нұсқама берілді. Жабдықтарды пайдалану заңнама талаптарына толық сәйкестендірілуі тиіс»,  деп хабарлады Қазақстанның сауда және интеграция министрлігі.

Жіберілген бұзушылықтар үшін мекеме Әкімшілік құқық бұзушылық туралы кодекстің 419-бабы бойынша әкімшілік жауапкершілікке тартылды. Айыппұл мөлшері 600 АЕК-ті (2 млн 595 мың теңге) құрап, белгіленген тәртіппен төленген.

Оқи отырыңыз:

• «Қазақстан — ортақ үйіміз»: Астанада 2000 оқушы «Алтын ұя» күйін тартты
• Астанада мәслихат шешімі күшіне еніп, көліктерді ақылы эвкуациялау басталды
• Тоқаев Израиль президентіне Alem.ai орталығын көрсетті