«Қазақстан — ортақ үйіміз»: Астанада 2000 оқушы «Алтын ұя» күйін тартты

Астана қаласындағы EXPO халықаралық көрме орталығы алаңында «Қазақстан — ортақ үйіміз» тақырыбында ауқымды музыкалық флешмоб өтті, деп хабарлайды Orda.kz елорда әкімдігі сайтына сілтеме жасап.

Іс-шараға қала мектептерінен шамамен 2000 оқушы қатысып, белгілі күйші-композитор Қаршыға Ахмедияровтың «Алтын ұя» күйін бір мезетте орындады. Оқушылар домбыра, қобыз, қылқобыз, жетіген, сазсырнай, сондай-ақ флейта мен скрипка сияқты ұлттық және классикалық аспаптарда ойнады.

Музыкалық флешмобқа елорданың өнер және музыка мектептерінің тәрбиеленушілері, сондай-ақ 10 мен 16 жас аралығындағы жалпы білім беретін мектеп оқушылары қатысты.

Ұйымдастырушылардың айтуынша, шараның басты мақсаты — «Қазақстан — ортақ үйіміз» идеясын музыка арқылы жеткізу. Әртүрлі аспаптардың үні бір арнаға тоғысып, көпұлтты елдің бірлігін бейнеледі. Қатысушылардың сөзінше, «Алтын ұя» күйін орындау олардың туған жерге деген сүйіспеншілігін терең сезінуге мүмкіндік берді.

Айта кетейік, «Алтын ұя» күйі Отанға деген сағыныш пен туған жерге деген махаббатты бейнелейтін шығарма ретінде кеңінен танылған.

Оқи отырыңыз:

• Астанада мәслихат шешімі күшіне еніп, көліктерді ақылы эвкуациялау басталды
• Желіде домбыраны «харам» деген ер адамға қылмыстық іс қозғалды
• Ұшқышсыз ұшу аппараттары мен әуе кеңістігін пайдалану қатаң бақыланады