Алматыда әл-Фараби даңғылындағы жол-көлік оқиғасы бойынша үш қылмыстық іс тергеліп жатыр

Бірнеше айдан бері қазақстандықтар Алматыдағы әл-Фараби даңғылында болған өлімге әкелген жол апатының тергелуін жіті бақылап отыр. Бұл іс бойынша үш қылмыстық іс қозғалды, деп хабарлайды Orda.kz.       

Күдікті П.-ға Қылмыстық кодекстің 345-1-бабының 4-бөлігі («Алкогольдік мас күйде жол қозғалысы ережелерін бұзу, абайсызда екі немесе одан да көп адамның өліміне әкелу») бойынша айып тағылған. Істің сотқа жолданғаны белгілі болды. 28 мамыр күні сағат 15:00-де Алматы қаласының қылмыстық істер жөніндегі мамандандырылған ауданаралық сотында алдын ала тыңдау өтеді.

Екінші қылмыстық іс Алматы қалалық полиция департаменті басшыларының бірінің жүргізушісі болған полиция қызметкеріне қатысты қозғалған. Оған Қылмыстық кодекстің 370-бабы 4-бөлігінің 1-тармағы («Ауыр зардаптарға әкелген қызметтік әрекетсіздік») бойынша айып тағылған. Қызметтік әрекетсіздік  бабы бойынша 7 жылға дейін бас бостандығынан айыру немесе шектеу қарастырылуы мүмкін.

Ішкі істер министрлігі бұл іс бойынша БАҚ сұрауына жауап беріп, тергеу аяқталуға жақын екенін және істің жақын арада сотқа жолданатынын хабарлаған.

«Күдіктіге қатысты қамауда ұстау түріндегі бұлтартпау шарасы таңдалды. Сотқа дейінгі тергеу аяқталу сатысында, жақын уақытта материалдар сотқа жіберіледі» деп жазылған ведомство хабарламасында. 

Үшінші қылмыстық іс те тергеліп жатыр. Оның кейбір жай-жапсарын қалалық прокуратура мәлімдеді. Лауазымдық өкілеттікті асыра пайдалану бабы бойынша  3 жылға дейін жаза қарастырылуы мүмкін.

«Мемлекеттік нөмірлерді заңсыз беру фактісі бойынша Қылмыстық кодекстің 362-бабы 1-бөлігі («Билікті немесе лауазымдық өкілеттіктерді асыра пайдалану») бойынша сотқа дейінгі тергеу жүргізілуде» деп жазылған прокуратура жауабында 

Прокуратура бұл іс бойынша нақты кімнің күдікті екенін (полиция қызметкері ме, әлде басқа лауазымды тұлға ма) нақтылаған жоқ. Бұл бойынша Қылмыстық-процестік кодекстің 201-бабына сәйкес тергеу құпиясына сілтеме жасалды.

Сарапшылардың айтуынша, Қылмыстық кодексте мемлекеттік нөмірлерді заңсыз беру үшін арнайы жеке бап қарастырылмаған.

Еске салсақ, 21 наурызға қараған түні әл-Фараби даңғылы мен Меңдіқұлов көшесінің қиылысында Zeekr көлігі қарсы жолаққа шығып кетіп, Mercedes автокөлігіне соғылған болатын.

Апат салдарынан 29 жастағы жүргізуші және Mercedes көлігіндегі 20 және 22 жастағы екі қыз оқиға орнында қаза тапты. Zeekr жүргізушісі аман қалып, түрлі жарақатпен ауруханаға жеткізілді. 26 наурызда тергеу соты оны қамауға алды. Апат кезінде оның жеңіл дәрежеде мас болғаны анықталған.

7 сәуірде күдікті ауруханадан тергеу изоляторына ауыстырылды, қазір ол тергеудің аяқталуын сол жерде күтуде. Оған Қылмыстық кодекстің 345-1-бабы 4-бөлігі бойынша («Алкогольдік мас күйде жол қозғалысы ережелерін бұзу, абайсызда екі немесе одан да көп адамның өліміне әкелу») қылмыстық іс қозғалған.

Әлеуметтік желілерде бұл жол апатына полиция қызметкерінің қатысуымен болған көше жарысы себеп болуы мүмкін деген болжамдар тарады. Осыған байланысты тексерістер мен қызметтік тергеулер басталды. Ішкі істер министрлігі Алматы полиция департаментінің бірқатар басшыларын қызметінен шеттетіп, олардың бірінің жүргізушісін ұстады.

Оқи отырыңыз:

• Алматының әл-Фараби даңғылындағы адам өлімі: Полиция тексеріліп жатыр
• Алматыдағы әл-Фараби даңғылында тағы бір жүргізуші әйелді қағып өлтірді
• Алматының әл-Фараби даңғылында көлік жарысы тоқтар емес
• Президент бақылауында: ІІМ Алматыдағы резонансты жол апаты бойынша тергеуді күшейтті