Алматының әл-Фараби даңғылында көлік жарысы тоқтар емес

Алматыдағы әл-Фараби даңғылындағы көлік жарысы тоқтар емес. Жақында ғана осы даңғылда жарысқан жастардың арқасында біраз шенді полицейлер жазаланған болатын. Алматы полициясы әлеуметтік желілерден тағы да әл-Фараби даңғылында бірнеше көліктің қауіпті маневр жасағаны түсірілген видеоны анықтады, деп хабарлайды Orda.kz.

Бейнежазбада қаланың ең көлік көп жүретін көшелерінің бірінде жол қозғалысы ережелерінің өрескел бұзылғанын анықтадық, деп жазады Polisia.kz.

«Іздестіру бөлімінің қызметкерлері барлық көлік иелерін анықтап, ұстады. Олар жол ережелерін бұзғаны үшін жауапкершілікке тартылды. Атап айтқанда олар қауіпті маневр жасаған, қарсы қозғалыс жолағына шығып кеткен, апатты жағдай туғызған, рөлде отырып ұялы телефон пайдаланған, қауіпсіздік белдігін тақпаған көлік жүргізушілерге қатысты», – деді Алматы қалалық ПД Әкімшілік полиция басқармасының бастығы Әбдинұр Тасыбаев. 

Полиция департаменті мұндай әрекеттер жолда өзгелердің өмірі мен денсаулығына нақты қауіп төндіретінін ескертті.

Еске салайық, 21 наурызға қараған түні Әл-Фараби даңғылы мен Меңдіқұлов көшесінің қиылысында Zeekr мен Mercedes көліктері соқтығысқан еді. Жол апаты салдарынан үш адам қаза тапты. Бұл оқиғада тек апаттың өзі ғана емес, жүргізушінің жеке тұлғасы да қоғам назарын аударып, шулы іске ұласып, бірқатар полицейлер жұмыстан кеткен болатын.

Тақырыпқа қатысты ұсынамыз: 

• Алматыдағы бес көлік жарысып, үш адам қаза болған шулы оқиғаға қатысты қылмыстық іс қозғалды
• Алматының әл-Фараби даңғылындағы адам өлімі: полиция тексеріліп жатыр
• Президент бақылауында: ІІМ Алматыдағы резонансты жол апаты бойынша тергеуді күшейтті