Алматыдағы әл-Фараби даңғылында тағы бір жүргізуші әйелді қағып өлтірді

Алматыдағы әл-Фараби даңғылында тағы бір адам жол апатынан қаза тапты. Желіде оқиға орнынан түсірілген видео тарап жатыр, деп хабарлайды Orda.kz.      

Алматыдағы басты автомагистральдің бірінде тағы да жол-көлік оқиғасы болды. Автокөлік дөңгелегінің астында қалып, бір әйел қаза тапты. Полиция департаментінің баспасөз қызметі оқиғаның егжей-тегжейін мәлімдеді.

Алматы қаласы полиция департаментінің мәліметінше, оқиға 25 наурызда түнгі сағат 22:50 шамасында Бостандық ауданында болған. Әл-Фараби даңғылы  бойымен шығыс бағытта келе жатқан Mitsubishi Delica жүргізушісі Розыбакиев көшесінің қиылысында жолдан өтіп бара жатқан әйелді қағып кеткен. Ауыр соққыдан жаяу жүргінші сол жерде тіл тартпай кетті.

Қазіргі уақытта кісі өліміне әкеп соққан бұл факт бойынша қылмыстық іс қозғалып, тергеу амалдары жүріп жатыр.

Айта кетейік, бұл — әл-Фараби бойындағы алғашқы қайғылы жағдай емес. Жақында ғана осы даңғылда үш адамның өмірін қиған ірі жол апаты болған еді. Желі қолданушылары сол оқиғаға күдікті кәсіпкерді қатаң жазалауды талап етті. Оқиғаға кінәлі 10 жылға сотталуы мүмкін. 

Полиция мәліметінше, бұл оқиғаның барлық қатысушылары мен оған қатысы бар адамдар анықталды. Оларға қатысты әкімшілік іс қозғалып, материалдар сотқа жіберілді. Ал көліктер айыппұл тұрағына қойылды.

Құқық қорғау органдары бейнебақылау камераларындағы барлық жазбаларды, соның ішінде жеке бейнежазбаларды тәркіледі, олар қылмыстық іс материалдарына қосылып, егжей-тегжейлі зерттеліп жатыр.

Оқи отырыңыз:

• Алматыда жол-көлік оқиғасынан үш адам қаза тапты
• Ақтөбе облысында жол апатынан бес адам қаза тауып, бір адам комада жатыр
• Алматыда ер адам жүк көлігінің астына түсіп қаза тапты