Президент бақылауында: ІІМ Алматыдағы резонансты жол апаты бойынша тергеуді күшейтті

4 наурызда ішкі істер министрі Ержан Сәденов Алматының әл-Фараби даңғылында болған жол апатына қатысты резонансты іс бойынша жұмыстың күшейтілген жағдайда жүріп жатқанын мәлімдеді, деп хабарлайды Orda.kz.      

Ержан Сәденовтің сөзінен ведомство Алматыдағы резонансты жол-көлік оқиғасының мән-жайын жан-жақты әрі объективті тергеу үшін кешенді шаралар қабылдап жатқаны белгілі болды.

Сонымен қатар тергеу барысы мемлекет басшысы Қасым-Жомарт Тоқаевтың тікелей  бақылауында.

«Тергеу барысы президенттің жеке бақылауында. Кінәлілердің барлығы мәртебесі мен жағдайына қарамастан заңға қатаң сәйкес жауапкершілікке тартылады» деп жазды ІІМ басшысы Ержан Сәденов. 

Оның айтуынша, полиция қазақстандықтардың барлық ақпаратын, соның ішінде әлеуметтік желілерде айтқан деректерді түгел тексеруде. Алматыға ІІМ-нің арнайы комиссиясы жіберілген. Тексеру қорытындысы бойынша жіберілген кемшіліктер үшін Алматы қалалық Полиция департаменті бастығының орынбасары, сондай-ақ әкімшілік полиция және қоғамдық қауіпсіздік басқармаларының бірнеше басшысы қызметтерінен босатылды.

Атап айтсақ, Алматы қалалық полиция департаменті бастығының орынбасары, Алматы қалалық әкімшілік полиция басқармасының басшысы,  Алматы қалалық қоғамдық қауіпсіздік басқармасының басшысы қызметінен босатылды. 

Ведомство сондай-ақ қызметтік тәртіпті нығайту және заңдылықты қамтамасыз ету бойынша қосымша шаралар қабылданып жатқанын хабарлады.

«Қалаға басқа өңірлерден күшейтілген полиция жасақтары жіберілді. Кең ауқымды рейдтік іс-шаралар жүргізілуде. Алғашқы күндері жол қозғалысы ережелерін бұзудың 4,8 мыңнан астам дерегі анықталды, оның ішінде мас болып көлік басқару, қарсы жолаққа шығу, жалған нөмірлік белгілерді пайдалану және тиісті құқығы жоқ көлік жүргізу фактілері бар. 2 мыңнан астам автокөлік айыппұл тұрағына қойылды» деп жазды Сәденов. 

Сонымен қатар министр осындай күшейтілген тексерулер бүкіл ел бойынша жүргізіліп жатқанын айтты.

Еске салсақ, ZEEKR көлігінің жүргізушісі әл-Фараби даңғылы бойымен келе жатып, қарсы жолаққа шығып, Mercedes автокөлігімен соқтығысқан. Апат салдарынан екінші көліктің жүргізушісі мен екі жолаушысы оқиға орнында қаза тапты. Адам өліміне әкелген жол апаты 21 наурызға қараған түні шамамен сағат 03:30-да әл-Фараби даңғылы мен Меңдіқұлов көшесінің қиылысында болған. 

Күдікті дене жарақаттарын алып, қазіргі уақытта медициналық мекемеде күзетпен жатыр. Жағдайы тұрақталғаннан кейін ол уақытша ұстау изоляторына қамалады. Сондай-ақ жүргізушіге алкогольді ішімдік қолдану фактісі бойынша сараптама тағайындалды.

Осы іске қатысты қала жұрты ғана емес барлық жұрт шулай бастаған соң Алматы полициясы әл-Фараби даңғылындағы өліммен аяқталған жол апатына өз қызметкерлерінің қатысы бар-жоғын тексеруге кірісті.

Оқи отырыңыз:

• Алматының әл-Фараби даңғылындағы адам өлімі: полиция тексеріліп жатыр
• Алматыда заңгер Әділетхан Молдаханның ұсталғанын полиция растады
• Алматыдағы резонанс: Жол апатынан кейін қай шенділер қызметінен кетті?