Алматы облысында жоғары технологиялық есірткі зертханасы әшкереленді

Полиция қызметкерлері жыл бойы элиталық каннабис сұрыптарын өсіріп, есірткі дайындаумен айналысқан жасырын наркозертхананы жойды, деп хабарлайды Orda.kz.

ІІМ мәліметінше, қылмыстық топ есірткі құрамды өсімдіктерді өсіруден бастап, дайын өнімді VIP-клиенттерге сатуға дейін өндірістің толық циклін ұйымдастырған. Зертхана автоматтандырылған желдету, жарықтандыру, суару және температураны бақылау жүйелерімен жабдықталған.

Тінту кезінде жертөледе орналасқан, бөлек кіреберісі жасырылған орыннан полицейлер 29 түп қарасора, 27 келі дайын есірткі, өсімдіктерді өсіруге арналған құрал-жабдықтар, электронды ақпарат тасымалдағыштар, байланыс құралдары, үш миллион теңге қолма-қол ақша, сондай-ақ тіркелмеген травматикалық қару мен оқ-дәрілерді тапты.

ІІМ Есірткі қылмысына қарсы іс-қимыл комитеті басқармасының бастығы Бақытжан Әмірхановтың айтуынша, жасырын өндірісті ұйымдастырған — 40 жастағы ер адам. Тергеу деректеріне сәйкес, ол ұзақ уақыт бойы каннабис өсіру технологияларын зерттеп, шетелдерге барып, арнайы жабдықтар сатып алған және 100 шаршы метрден асатын жеке ғимарат салып, өндірісті кеңейтуді жоспарлаған.

Кейінгі жедел шаралар барысында оның сыбайласы болуы мүмкін тағы бір адам — 45 жастағы, бұрын аса ауыр қылмыстар үшін бірнеше рет сотталған ер адам ұсталды. Оның гаражын тінту кезінде полицейлер төрт келі гашиш, оралған есірткі заттары, zip-пакеттер және оларды қолдануға арналған құралдарды тәркіледі.

Барлық күдіктілер уақытша ұстау изоляторына қамалды. Тергеу қылмыстық схеманың басқа қатысушыларын, жабдық пен тұқым жеткізу арналарын анықтап жатыр. Тергеу нұсқасы бойынша қылмыстық табыстарға сатып алынған мүліктер, оның ішінде жылжымайтын мүлік пен қымбат көліктерге тыйым салынды.

Оқи отырыңыз:

• Энергетика министрлігі екі өңірде автогаз тапшылығы бар деген ақпаратты жоққа шығарды
• Иран мен АҚШ бір-біріне шабуыл жасамауға тағы да уәде берді
• БҰҰ: Есірткінің жаңа түрлері нарықты жаулап барады