Энергетика министрлігі екі өңірде автогаз тапшылығы бар деген ақпаратты жоққа шығарды

 Энергетика министрлігі Маңғыстау және Атырау облыстарында сұйытылған мұнай газын жеткізуде іркілістер бар деген хабарламаларға түсініктеме берді, деп хабарлайды Оrda.kz.

Бұған дейін аталған өңірлердегі жанармай құю станцияларында автогазға қатысты жағдайдың күрделі екені туралы ақпарат тараған еді. Жүргізушілер ұзын-сонар кезектерге шағымданған.

Министрліктің мәлімдеуінше, екі өңірге де автогаз жеткізу тұрақты режимде және есептелген айлық қажеттіліктен артық көлемде жүзеге асырылып жатыр.

Мәселен, маусым айында Маңғыстау облысының қажеттілігі 18 мың тонна деп белгіленсе, іс жүзінде өңірге 19,5 мың тонна сұйытылған газ бөлінген. Маусымдық сұраныстың артуын жабу үшін қосымша 1,5 мың тонна «СНПС-Ақтөбемұнайгаз» АҚ ресурстарынан жеткізілген.

Ал Атырау облысында есептік қажеттілік 9 мың тонна. Атырау мұнай өңдеу зауытындағы жоспарлы жөндеу жұмыстарына байланысты Энергетика министрлігі жеткізу сызбасын алдын ала өзгертіп, өңірге резервтік көлемдер бағыттаған. Нәтижесінде маусым айында облысқа 11,6 мың тоннадан астам газ жеткізіліп, бұл қажетті көлемнен 2,5 мың тоннаға артық.

Министрлік бұл қорлар жергілікті автокөліктерді де, транзиттік көліктерді де қамтамасыз етуге толық жеткілікті екенін атап өтті. Сондай-ақ жанармайды жөнелту күн сайын жүргізілуде.

Сонымен қатар ведомство жергілікті іркілістер Қарашығанақ кен орнындағы өндірістің төмендеуімен байланысты болуы мүмкін деген ақпаратты да жоққа шығарды. Министрлік мәліметінше, кен орнындағы жоспарлы жұмыстар ішкі нарықты қамтамасыз етуге әсер етпейді, ал жеткізілім жағдайы министрлік пен жергілікті атқарушы органдардың тұрақты бақылауында.

Оқи отырыңыз:

• Ақтаудағы автомобильге газ құю бекетінде ұзын-сонар кезек
• Қазақстанда автогаз бағасы өзгеруі мүмкін – Энергетика министрлігі
• Ақтөбеде автогаз құю бекетінде көлік өртеніп, екі жасөспірім мен бір ересек адам тірідей жанып кетті